19 қазанда М.Х. Дулати атындағы Тараз университетінде TARAZ CREATIVE INDUSTRIES 2026 креативті индустриялар апталығының салтанатты ашылу рәсімі өтті. Іс-шара Қазақстан Республикасының Ғылым және жоғары білім министрі Саясат Нұрбектің құттықтау бейнежолдауымен басталды. Апталықтың алғашқы күнінде ұйымдастырылған пленарлық сессияларда креативті индустрияларды дамыту, шығармашылық бастамаларды қолдау, білім мен кәсіпкерлікті ұштастыру және жаңа технологияларды коммерцияландыру мәселелері талқыланды.
Алғашқы пленарлық сессияда М.Х. Дулати атындағы Тараз университеті Директорлар кеңесінің төрағасы Рақымбек Қуатбекұлы Жолаев, Қазақстан Республикасы Ұлттық инженерлік академиясының академигі, «Тәуелсіз Қазақстанның үздік инженері» номинациясының алғашқы лауреаты Амандық Ғаббасұлы Баталов, Қазақстан Республикасы Құрылтайының депутаты Гүлісхан Сайфуллинқызы Нахбаева, мемлекет қайраткері, Тараз және Талдықорған қалаларының бұрынғы әкімі Ғалымжан Райылұлы Абдраимов, Технологияларды коммерцияландыру кәсіпкерлері альянсының басшысы, Павлодар педагогикалық университеті Директорлар кеңесінің төрағасы Арын Амангельдиевич Орсариев және М.Х. Дулати атындағы Тараз университетінің ректоры Ләззат Қалымбекқызы Еркінбаева сөз сөйледі.
Кездесу барысында креативті салалардың әлеуеті, шығармашылық идеяларды іске асыру тетіктері және оларды экономикалық дамудың маңызды бағытына айналдыру мәселелері сөз болды. Іс-шараның ерекше сәттерінің бірі – Амандық Ғаббасұлы Баталовтың университет ректоры Ләззат Қалымбекқызы Еркінбаеваға Үш бидің бейнесі салынған картинаны сыйға тартуы.
Екінші пленарлық сессияда креативті экожүйені қалыптастыру, білім беру мен кәсіпкерлік арасындағы байланысты нығайту, шығармашылық жобаларды қолдау және салааралық ынтымақтастықты дамыту бағыттары қарастырылды. Қатысушылар жаңа идеяларды жүзеге асыру, технологиялық шешімдерді тәжірибеге енгізу және креативті индустриялардың дамуына серпін беретін мүмкіндіктер жөнінде пікір алмасты. Апталықтың алғашқы күні мазмұнды кездесулер мен тәжірибе алмасуға ұласып, креативті индустриялардың даму перспективаларын талқылауға мүмкіндік берді. Алдағы іс-шаралар шығармашылық әлеуетті арттыруға, жаңа бастамаларды қолдауға және осы бағыттағы әріптестікті кеңейтуге негіз болмақ.
Мақала Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
