Жамбыл облысының спортшылары 2026 жылы қазақ күресі мен жекпе-жектен өткен республикалық және халықаралық жарыстарда жоғары нәтиже көрсетіп, өңір мерейін үстем етті. Бірқатар балуан Қазақстан чемпионаттары мен кубоктерінде жүлделі орындарға ие болса, халықаралық бәсекелерде чемпиондық тұғырға көтерілді. Сонымен қатар жасөспірімдер мен мектеп оқушыларын ұлттық спортқа тарту бағытындағы жұмыстар да жүйелі түрде жалғасуда.
Қазақ күресінен жамбылдық балуандар жыл басынан бері бірқатар ірі жарыста шеберліктерін дәлелдеп, үздіктер қатарынан көрінді. 21-25 сәуір аралығында Семей қаласында өткен Қазақстан Республикасының чемпионатында Кемелбек Сабырбек 100 келі салмақ дәрежесінде қарсыластарынан басым түсіп, бірінші орынды иеленді. Ал 60 келіде белдескен Исаханов Нұрхат қола жүлдегер атанды.
Түркістан қаласында ұйымдастырылған Қазақстан Республикасының кубогінде Федоров Данил жеңімпаз атанып, өзінің жоғары дайындық деңгейін көрсетті. Ал 14-15 мамыр күндері Қарағанды қаласында өткен Азия кубогінде Сүлеймен Ернұр 60 келі, Нұғман Бейбарыс 90 келі салмақ дәрежелерінде чемпион атанса, Федоров Данил 100 келіден жоғары салмақта үшінші орынға ие болды.
Жамбылдық спортшылардың халықаралық аренадағы жарқын жетістіктерінің бірі 22-24 тамыз аралығында Әзербайжанның Баку қаласында өткен ересектер арасындағы қазақ күресінен әлем чемпионатында тіркелді. 60 келі салмақ дәрежесінде белдескен Сүлеймен Ернұр қарсыластарынан басым түсіп, әлем чемпионы атанды. Сондай-ақ 31 тамыз бен 6 қыркүйек аралығында Қырғыз Республикасының Ыстықкөл облысында өткен жарыста да ол 60 келі салмақта чемпиондық атақты иеленді. Бұл нәтижелер балуанның жоғары шеберлігін және халықаралық деңгейдегі бәсекелерде тұрақты нәтиже көрсете алатынын аңғартады.
Жамбыл облысының спортшылары жекпе-жектен де табысты өнер көрсетіп келеді. 7-10 қазан аралығында Тараз қаласында өткен Қазақстан Республикасының чемпионатында облыс құрамасы жалпы командалық есепте екінші орынға ие болды. Жарыс барысында 71 келі салмақ дәрежесінде сынға түскен Бекболат Рауан күміс жүлдегер атанды. Ал 52 келіде белдескен Төлепперген Гүлмира мен 67 келіден жоғары салмақ дәрежесіндегі Оразхан Зейнеп қарсыластарынан басым түсіп, чемпиондық атақты жеңіп алды.
Спортшылардың жетістіктерімен қатар, жас ұрпақты ұлттық спорт түрлеріне баулу жұмыстарына да басымдық берілуде. Осы мақсатта мектеп оқушылары арасында мектеп лигалары мен түрлі турнирлер ұйымдастырылып, асық ату мен тоғызқұмалақтан аудандық және облыстық біріншіліктер тұрақты өткізіледі. Мұндай жарыстар балалардың ұлттық құндылықтарға деген қызығушылығын арттырып қана қоймай, олардың ептілігін, ойлау қабілетін, төзімділігі мен жеңіске деген жігерін қалыптастыруға ықпал етеді.
Ұлттық спортты дәріптеу, жас спортшылардың шеберлігін шыңдау және олардың республикалық әрі халықаралық додаларда өңір намысын абыроймен қорғауына жағдай жасау – маңызды міндеттердің бірі. Жамбылдық балуандардың биылғы жетістіктері өңірде ұлттық спорттың дамып, спортшылардың жоғары нәтижелерге қол жеткізіп келе жатқанын көрсетеді. Ал жас буынды спортқа тартуға бағытталған жүйелі жұмыстар ұлттық спорттың өрісін кеңейтіп, болашақ чемпиондардың қалыптасуына жол ашады.
Мақала Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
