Жамбыл облысында ұлттық қолөнерді дәріптеуге, ата-бабадан мұра болып қалған дәстүрлі өнерді жаңғыртуға және тұрғындардың қолөнерге деген қызығушылығын арттыруға бағытталған «Бабалар аманаты» жобасы жүзеге асырылды.
Жоба «Qoloner Taraz» қоғамдық бірлестігінің ұйымдастыруымен шағын гранттар конкурсы аясында іске асырылды.
Жоба аясында қазақ халқының дәстүрлі қолөнер түрлерін үйретуге бағытталған шеберлік сабақтары ұйымдастырылды. Атап айтқанда, қатысушылар қой жүнін басу техникасын меңгеріп, шашақбау түю және тұскиіз сырмақ тігу бойынша практикалық білім мен дағдылар алды.
Шеберлік сабақтары барысында қой жүнін сұрыптау, тазалау және өңдеу, одан тұрмыстық әрі сәндік бұйымдар жасау технологиялары түсіндірілді. Сонымен қатар, шашақбау дайындау кезінде жіптерді өңдеу, түстерді үйлестіру және шашақтарды біріктіру тәсілдері үйретілді. Ал сырмақ тігу сабақтарында ұлттық ою-өрнектерді қолдану, киізді өңдеу және дәстүрлі бұйымдарды тігу әдістеріне басымдық берілді.
Іс-шараларға жастар, жұмыссыз әйелдер және «Белсенді ұзақ өмір» орталығының қатысушылары тартылды. Бұл бастамалар әртүрлі әлеуметтік топтардың шығармашылық қабілеттерін дамытуға, ұлттық мұраға деген қызығушылығын арттыруға және дәстүрлі қолөнерді күнделікті өмірде қолдану дағдыларын қалыптастыруға мүмкіндік берді.
Жоба аясында қой жүнін басу, шашақбау түю және тұскиіз сырмақ тігу бағыттары бойынша жалпы 10 шеберлік сабағы ұйымдастырылып, есепте көрсетілген мәліметтерге сәйкес 122 қатысушы қамтылды.
«Бабалар аманаты» жобасы ұлттық қолөнерді ұлықтауға, дәстүрлі өнердің сабақтастығын сақтауға және қазақ халқының мәдени мұрасын кейінгі ұрпаққа жеткізуге бағытталған маңызды бастама болды.
