«Отбасылық байланыстарды қалпына келтіру» жобасы өз мәресіне жетті
Жамбыл облысында отбасылық байланыстарды қалпына келтіруге, туыстарын іздестіруге және қиын жағдайға тап болған азаматтарға гуманитарлық қолдау көрсетуге бағытталған «Отбасылық байланыстарды қалпына келтіру» жобасы жүзеге асырылды.
Жоба Қазақстан Қызыл Ай Қоғамының Жамбыл облыстық филиалының ұйымдастыруымен шағын гранттар конкурсы аясында 2026 жылғы 1 шілде мен 30 қыркүйек аралығында іске асырылды.
Жоба аясында уақытша орналастырылған азаматтарға қолдау көрсету, отбасылық байланыстарды қалпына келтіру тетіктері туралы ақпараттандыру және әлеуметтік қолдау көрсететін мекемелермен өзара ынтымақтастықты нығайту бағытында бірқатар іс-шара ұйымдастырылды.
Атап айтқанда, Тараз қаласы Полиция басқармасының қабылдап-тарату бөлімінде уақытша орналастырылған азаматтармен қолдау кездесулері өткізіліп, олардың туыстарымен телефон арқылы байланысуына мүмкіндік жасалды. Сонымен қатар, азаматтарға гуманитарлық көмек ретінде киім-кешек пен санитарлық-гигиеналық құралдар таратылды.
Бұдан бөлек, Тараз қаласы Полиция басқармасының мамандарымен, Жамбыл облыстық тұрмыстық зорлық-зомбылық құрбандарына әлеуметтік көмек көрсету орталығының қызметкерлері мен көмек алушыларымен, «Отбасы орталығының» мамандарымен және облыстық Полиция департаментінің өкілдерімен диалог алаңдары ұйымдастырылды.
Кездесулер барысында отбасылық байланыстарды қалпына келтіру, хабар-ошарсыз кеткен адамдарды іздестіру, Екінші дүниежүзілік соғыс кезінде байланыссыз кеткен азаматтар мен әскери қызметкерлердің тағдырын анықтау, төтенше жағдайлар салдарынан үзілген отбасылық байланыстарды қалпына келтіру және саяси қуғын-сүргінге ұшыраған азаматтардың туыстарын іздестіру мәселелері түсіндірілді.
Сондай-ақ, әлеуметтік қолдау көрсету, тұрмыстық зорлық-зомбылықтың алдын алу және гуманитарлық көмек тетіктері талқыланып, мемлекеттік мекемелер мен қоғамдық ұйымдар арасындағы ынтымақтастықты дамыту жөнінде ұсыныстар айтылды.
Жоба аясындағы алты іс-шараға жалпы саны 330 адам қатысты. Нәтижесінде азаматтардың отбасылық байланыстарды қалпына келтіру қызметтері туралы ақпараттану деңгейін арттыруға, әлеуметтік қолдау көрсетуге және жауапты мекемелермен өзара іс-қимылды нығайтуға бағытталған жұмыстар жүргізілді.
«Отбасылық байланыстарды қалпына келтіру» жобасы азаматтарға гуманитарлық қолдау көрсетудің, отбасылық құндылықтарды сақтаудың және қиын жағдайға тап болған адамдарға көмек көрсетудің маңызын айқындады.
