Бұл туралы кезекті үкімет отырысында ҚР Төтенше жағдайлар министрі Юрий Ильин мәлімдеді. Жыл басынан бері еліміздің су айдындарында 69 адам құтқарылды, оның ішінде 15-і бала, шомылу маусымы басталғаннан бері — 11 адам, оның ішінде 2-еуі бала. Жүргізіліп жатқан профилактикалық жұмыстарға қарамастан 45 адам суда қаза болды, оның ішінде 14-і кәмелетке толмаған. Суға батқандардың ең көбі Ақтөбе, Абай, Қостанай облыстарында.
Министрдің мәлімдеуінше су айдындарында адамдардың жиі қаза болуының негізгі себебі жабдықталмаған орындарда шомылу, балаларды қараусыз қалдыру, мас күйде шомылду болып отыр.
Сонымен қатар, Юрий Ильин шомылуға арналған белгілі бір орындардың жеткіліксіз екенін, осыған байланысты жергілікті атқарушы органдар халыққа арналған жабдықталған жағажайларды ұйымдастыру жұмыстарын жалғастыру қажеттігі, бұл шомылу маусымының қауіпсіз өтуі үшін қажет екендігі туралы атап өтті. Шомылатын орындарды құру және жабдықтау — қауіпсіздіктің негізгі талаптарының бірі.
Дәл қазіргі уақытта ел аумағында шомылуға рұқсат етілген 487 орын бар. Оның ішінде 149-і коммуналдық, 338-і жеке жағажай. Азаматтардың қауіпсіздігін қамтамасыз ету үшін қажетті құтқару жабдықтарымен жабдықталған құтқару бекеттерімен қамтамасыз етілген 307 жағажай бар. Қалған 180 рұқсат етілген орын (коммуналдық және жеке) медициналық пункттермен және балаларға арналған шомылу учаскелерімен қамтамасыз етілмеген.
Адамдардың судағы қауіпсіздігін қамтамасыз ету мақсатында ТЖМ полиция департаменттерімен және әкімдіктермен бірлесіп ұйымдастырушылық және практикалық іс-шаралар кешенін өткізуде.
Мемлекеттік органдармен және әкімдіктермен бірлесіп 45 мыңнан астам рейдтік және үгіттеу жұмыстары жүргізілді, оған жүз мыңнан астам адам қатысты. Күнделікті рейдтік үгіттеу жұмыстары барысында 480 бұзушы әкімшілік жауапкершілікке тартылды.
Қауіпсіз жағажайларда, стационарлық жағажайларда және модульді-қаңқалы бассейндерде (модульдік-қаңқалы бассейндерді сатып алу жүргізілуде) ТЖМ құтқарушылары әкімдіктермен бірлесіп балаларды жүзу дағдыларына үйретуде. Соңғы үш жылда жүз мыңнан астам кәмелетке толмағандар оқытылды. Ағымдағы жылдың басынан бері 19 мыңға жуық бала оқытылды, — деді министр өз сөзінде.
Халықты жазатайым жағдайлардан сақтандыру үшін елдің кейбір аймақтарында инновациялық әдістер пайдаланылып жатыр. Мәселен, Алматы қаласында су айдынын патрульдеу мен судағы қауіпсіздікті еске салып отыратын дрондар қолданылады. Ақтөбеде арнайы бағдарламалық қамтамасыз ету әдісі енгізілген.
Қазіргі уақытта ТЖМ Экология және табиғи ресурстар министрлігімен бірлесіп, рұқсат етілген және шомылуға тыйым салынған орындарды карталарға енгізе отырып, интерактивті картаны іске қосы мәселесі талқыланып жатыр.
