Өткен айда ел мен өңір өміріндегі маңызды оқиғалар, қоғамдық мәселелер және өзекті жаңалықтар оқырман тарапынан кеңінен назарға ілікті. Наурыз айында жарияланған материалдар арасында түрлі саладағы мақалалар көш бастады.
Солардың бірі – Жамбыл облыстық денсаулық сақтау басқармасының бұрынғы басшысы Жанар Оспанованың өмірден озуы туралы қаралы хабар. Өңір медицинасының дамуына елеулі үлес қосқан тұлға жайлы мақала кеңінен оқылды.
Сонымен қатар, 2026 жылдың бірінші тоқсаны бойынша әкімдер рейтингі туралы сараптамалық материал да оқырман назарынан тыс қалмады. Онда өңір басшыларының жұмыс нәтижелері мен көрсеткіштері жан-жақты сараланды.
Қасиетті Ораза айт мейрамына байланысты айт намазының уақытының жариялануы тұрғындар үшін маңызды ақпараттың біріне айналды. Бұл жаңалық мерекеге дайындалып жатқан жұртшылық үшін қажетті мәлімет болды.
Экологиялық бағыттағы бастамалар ішінде «Таза Қазақстан» аясында Жамбыл облысында өткен «Мөлдір бұлақ» акциясы да көп қаралым жинады. Табиғатты қорғау, су көздерін тазалау және экологиялық мәдениетті қалыптастыруға бағытталған шара туралы мақала оқырмандар арасында кеңінен таралды.
Білім мен зияткерлік сайыстар тақырыбындағы материалдар қатарында «Ой шебері – 2026» байқауының екінші айналымы ерекше орын алды. Бұл кезеңде 117 команда бақ сынап, өзара мықтыларды анықтауға күш салды.
Осылайша, наурыз айында жарияланған мақалалар қоғам өмірінің әртүрлі саласын қамтып, оқырман тарапынан жоғары сұранысқа ие болды.
Фото:bilimger.kz
