Қоғамдық орындарда тазалықты сақтау және қоршаған ортаға залал келтірудің алдын алу шаралары аудан әкімдігінің тікелей бақылауына алынған.
Қазақстан Республикасының Әкімшілік құқық бұзушылық туралы кодексінің 505-бабы («Қалалар мен елді мекендердің аумақтарын абаттандыру қағидаларын бұзу») және 434-бабы («Ұсақ бұзақылық, қоғамдық орындарды ластау») бойынша 2026 жылдың 8 айында экологиялық және қоғамдық тәртіп талаптарын бұзуға қатысты 1 084 дерек тіркелді. Анықталған заңбұзушылықтар бойынша полиция қызметкерлері тарапынан 1 072 құқық бұзушыға ресми түрде ескерту берілсе, талаптарды орындамаған 12 дерек бойынша әкімшілік айыппұл салынды.
Сонымен қатар тұрғындардың шағымдары мен ұсыныстарына жедел үн қосу мақсатында «Таза Қазақстан» акциясының Telegram-боты ақпараттық сервисі де белсенді жұмыс істеп тұр. Жыл басынан бері аталған сандық сервис арқылы 19 өтінім келіп түсті. Тұрғындар тарапынан жолданған бұл өтінімдер белгіленген заңнамалық мерзімдерде қарастырылып, көрсетілген аумақтар бойынша тиісті санитарлық және абаттандыру жұмыстары жедел орындалды.
Жамбыл ауданы әкімдігі тарапынан энергетикалық инфрақұрылымды дамыту, қоршаған ортаны қорғау, санитарлық тазалықты сақтау, экологиялық туризмді дамыту және тұрғындардың экологиялық мәдениетін арттыру бағытындағы жұмыстар алдағы уақытта да тұрақты түрде жүргізіле береді. Аталған жүйелі шаралар ауданның әлеуметтік-экономикалық тұрғыдан дамуына оң ықпал етіп, өңірдегі тұрғындардың өмір сүру сапасын арттыруға негіз болады.
