Ш.Уәлиханов атындағы Жамбыл облыстық әмбебап-ғылыми кітапханасының қызметкерлері «Жазушымен бір күн» жобасы аясында жерлес жазушы Берік Шаханұлының 85 жылдығына орай №69 мектепте «Ерттеп міндім асыл сөздің дүлдүл атын» атты ой толғам кешін ұйымдастырды.
Әдеби кештің құрметті қонақтары — Ш.Мұртаза атындағы Халықаралық Тараз университетінің профессоры, филология ғылымдарының кандидаты, Қазақстан Жазушылар одағының мүшесі Меңдібай Әбілұлы және белгілі жамбылдық балалар жазушысы, журналист, Қазақстан Журналистер одағының мүшесі Марат Құлибайұлы болды.
Қонақтар қаламгердің өмір жолы мен шығармашылығы туралы ой-пікірлерімен бөлісіп, оның қазақ әдебиетіндегі орнына тоқталып, оқушыларға тағылымды әңгімелерін арнады.
Кездесу барысында жазушының өмірі мен шығармашылығына арналған бейнеролик көрсетіліп, «Ақ теке», «Ғашықтың тілі», «Ақ иірім», «Қаратаудың самалы», «Құса» сынды шығармалары таныстырылды. Сонымен қатар кітап көрмесіне шолу жасалып, оқушылар арасында танымдық сұрақ-жауап ұйымдастырылды.
Оқушылар қаламгер мұрасы туралы білімдерін ортаға салып, шығармаларынан алған әсерлерімен бөлісті.
Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
