Кездесудің басты мақсаты – кітап оқу мәдениетін қалыптастыру, оқырмандардың дүниетанымын кеңейту, тарихи-танымдық әдебиеттерге деген қызығушылығын арттыру және оқылған шығарма төңірегінде еркін пікір алмасу алаңын қалыптастыру.
Іс-шара барысында қатысушылар кітаптың мазмұнына кеңінен тоқталып, автордың адамзат тарихына қатысты тұжырымдары мен көзқарастарын талқылады. Атап айтқанда, адамзаттың қалыптасуы мен дамуы, когнитивтік революция, ауыл шаруашылығының пайда болуы, ғылыми-техникалық прогресс, мәдениет пен өркениеттің дамуы сияқты маңызды тақырыптар сөз болды.
Юваль Ной Харари өз еңбегінде адамзаттың өткен тарихына жаңаша көзқараспен қарап, адамдардың қоғам құруына, бірлесіп әрекет етуіне және өркениеттің қалыптасуына ықпал еткен факторларды түсіндіреді. Автордың тарихи деректерді философиялық пайымдаулармен ұштастыра баяндауы оқырманды адамзаттың өткені мен бүгініне тереңірек үңілуге жетелейді.
Талқылау барысында кітапхана қызметкерлері шығарманың мазмұны бойынша өз ой-пікірлерін ортаға салып, автор көтерген мәселелерге қатысты көзқарастарымен бөлісті. Әсіресе адамзаттың даму жолы, қоғамдағы өзгерістер, білім мен ғылымның маңызы, адамның табиғаты және болашақ өркениеттің бағыттары туралы қызықты пікірлер айтылды. Қатысушылар кітаптағы тарихи оқиғаларды бүгінгі қоғамдағы үдерістермен байланыстыра отырып, өзара ой алмасты.
Кездесу еркін пікір алмасу форматында өтіп, әр қатысушыға өз ойын білдіруге, жаңа көзқарастармен танысуға және кітаптың мазмұнын тереңірек түсінуге мүмкіндік берді.
Осындай танымдық кездесулер кітапхана ұжымының кәсіби және зияткерлік дамуына ықпал етіп қана қоймай, кітап оқуға деген қызығушылықты арттыруға, сыни ойлау қабілетін дамытуға және оқырмандық мәдениетті нығайтуға жол ашады.
Кітап оқу – адамның рухани әлемін байытып, таным көкжиегін кеңейтетін маңызды құндылық. «Кітап оқитын ұлт» марафоны аясындағы мұндай игі бастамалар алдағы уақытта да өз жалғасын таба бермек.
Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
