Сенат Спикерінің айтуынша, Қазақстанда Үкімет жанындағы демографиялық саясат саласына жауапты уәкілетті орган да, ведомствоаралық комиссия да жоқ. Сондықтан ол барлық мүдделі органдарға назар аударуға тиіс негізгі аспектілерді атап өтті.
«Егер бізде бағдарлама, уәкілетті орган, ведомствоаралық комиссия және кадр болмаса, бүгін сарапшылар айтқандай, бұл салада қандай саясат талқылануы мүмкін? Осыған байланысты, біріншіден, біз бұл бағыттағы тәсілдерді қайта қарауымыз керек. Екіншіден, барлық ілеспе мәселелерге қарамастан, халық санын көбейту қажет. Бұл – стратегиялық мәселе», – деді Мәулен Әшімбаев.
Сондай-ақ ол демографиялық саясатты әлеуметтік, көші-қон және тағы басқа салалармен үйлесімді жүргізу керек екенін айтты. Өйткені мұндай кешенді тәсіл және аймақтардың ерекшеліктерін ескеру – тиімді жұмыстың маңызды шарты.
«Демографиялық саясаттан өзімізге не керек екенін білуіміз керек. Біз халықтың сан жағынан да, сапа жағынан да өскенін қалаймыз. Мұны қалай қамтамасыз етеміз? Бұл ретте оңтүстіктен солтүстік аймақтарға көшуге ықпал ететін тетіктерді табуымыз қажет. Орта және ұзақ мерзімде Қазақстанда сыртқы көші-қон мәселесі де туындауы мүмкін. Мұнда да Үкіметтің жан-жақты зерделенген саясаты қажет. Ондай саясаттың, тұжырымдамалық құжаттардың жоқтығын, демографиялық тәсілдердің жүйесіздігін көріп, біз осы Үкімет сағатын өткізуді қолға алдық», – деді Мәулен Әшімбаев.
Парламент Сенатының баспасөз қызметі
