Бұл жолы көшпелі акция Тараз қаласындағы Бауыржан Момышұлы атындағы «Жеңіс» саябағында өтті.
Бұл бастама көшпелі кеңес беру форматында жүзеге асырылуда. Соның арқасында аймақ тұрғындары мемлекеттік органдардың ғимараттарына бармай-ақ, білікті заңгерлік көмек алу мүмкіндігіне ие болды.
— Жобаның басты міндеті — құқықтық көмекті өңірдің әрбір тұрғынына, әсіресе шалғай елді мекендерде тұратын жандарға барынша қолжетімді ету. Құқық бұзушылықтың алдын алуға, құқықтық мәдениет деңгейін көтеруге және азаматтардың заңды мүдделерін қорғауға ерекше көңіл бөлінуде, — деді Жамбыл облысы Полиция департаменті бастығының орынбасары Әсет Оспанов.
Мобильді топтың құрамына әкімшілік полиция, көші-қон қызметі, қоғамдық қауіпсіздік, есірткі қылмысына қарсы іс-қимыл бөліністерінің, киберполиция қызметкерлері, сондай-ақ жергілікті атқарушы органдардың өкілдері кірді. Мұндай ведомствоаралық тәсіл азаматтардың өтініштерін жан-жақты қарауға және туындаған мәселелерге жедел әрекет етуге мүмкіндік береді.
Мамандар қолданыстағы заңнама нормаларын түсіндіріп, құқықтық мәселелер бойынша кеңес берді және азаматтарға нақты өмірлік жағдайларды шешуге көмектесті. Тұрғындар тарапынан қоғамдық қауіпсіздікті қамтамасыз ету, жол қозғалысы ережелері, көші-қон заңнамасы, отбасылық-тұрмыстық қатынастар, мүліктік мәселелер мен цифрлық қауіпсіздік сияқты кең ауқымды тақырыптар қозғалды.
Керуен жұмыс істеген бір күннің ішінде облыс орталығының 100-ден астам тұрғыны кеңес алды. Барлық өтініштер жеке-жеке қаралып, мәселені шешудің ықтимал жолдары мен практикалық ұсынымдар егжей-тегжейлі түсіндірілді. Тұрғындар бұл форматтың өте ыңғайлы екенін, сұрақтарға бірден әрі қысқа мерзімде жауап алуға мүмкіндік беретінін атап өтті.
Жұмыстың маңызды бөлігі — кері байланыс: мамандар жиі қойылатын мәселелерді түртіп алып отырады. Бұл жергілікті жерлердегі жағдайды талдауға және алдын алу жұмыстарын реттеп отыруға септігін тигізеді. Мұндай тәсіл халықтың нақты сұраныстарын дәлірек анықтауға көмектеседі және мемлекеттік органдардың азаматтармен өзара іс-қимылының тиімділігін арттырады.
— «Заң мен Тәртіп» профилактикалық керуені Жамбыл облысының елді мекендерінде жұмысын одан әрі жалғастырады. Алдағы уақытта жаңа сапарлар жоспарланған, оның аясында тұрғындар әртүрлі мәселелер бойынша кәсіби кеңестер ала алады. Бұндай бастамалар халық пен мемлекеттік құрылымдар арасындағы сенімді нығайтуға, сондай-ақ өңірде қауіпсіз әрі құқықтық сауатты ортаны қалыптастыруға ықпал етеді, — деп толықтырды Әсет Оспанов.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
