Осы орайда Жамбыл облысының денсаулық сақтау басқармасында сыбайлас жемқорлық тәуекелдеріне ішкі талдау жүргізу және профилактикалық шараларды жетілдіру мәселелері қаралған аппараттық кеңес өтті.
Басқарма басшысы Сержан Назарбектің төрағалығымен өткен жиында сыбайлас жемқорлық құқық бұзушылықтарының туындауына ықпал ететін факторларды анықтау және жүйелі түрде алдын алу жұмыстарын ұйымдастыру мәселелері талқыланды. Басқарма басшысы өз сөзінде сыбайлас жемқорлыққа қарсы іс-қимыл мемлекеттік саясаттың басты басымдықтарының бірі екенін атап өтіп, ішкі талдау жұмыстары тұрақты негізде жүргізілуі және тек проблемалық аймақтарды анықтаумен шектелмей, заң бұзушылықтарға әкеп соғатын себептер мен жағдайларды жоюға бағытталуы тиіс екенін жеткізді.
Кеңес барысында медициналық ұйымдар басшыларының заңнама талаптарын сақтау және жұмыс процестерінің ашықтығын қамтамасыз етудегі жеке жауапкершілігін арттыру мәселесіне ерекше назар аударылды. Сондай-ақ Қазақстан Республикасы Мемлекеттік қызмет істері агенттігінің Жамбыл облысы бойынша департаменті басшысының орынбасары Дәурен Омаров сыбайлас жемқорлыққа қарсы заңнамадағы өзекті өзгерістерді түсіндіріп өтті.
Жиынға қатысушыларға «Сыбайлас жемқорлыққа қарсы іс-қимыл туралы» Қазақстан Республикасы Заңының негізгі талаптары таныстырылып, ұйымдардағы комплаенс-қызметтердің жұмысын одан әрі дамыту мәселелері сөз болды. Мемлекеттік сатып алуларды өткізу кезінде ішкі бақылауды күшейту, заңдылықты қатаң сақтау және жемқорлық көріністерінің алдын алу механизмдерінің тиімділігін арттыру мәселелері де егжей-тегжейлі талқыланды.
Жиналыс қорытындысы бойынша медициналық ұйымдардың басшыларына сыбайлас жемқорлыққа қарсы заңнама нормаларының мүлтіксіз орындалуын қамтамасыз ету тапсырылды. Бұл талаптардың орындалуына емдеу мекемелерінің басшылары дербес жауапты болатыны ескертілді.
Сонымен қатар, алдын алу жұмыстарын күшейту, комплаенс-қызметтердің жұмысын жетілдіру және белгіленген талаптардың сақталуын тұрақты бақылауда ұстау міндеттелді. Осы бағыттағы жүйелі жұмыс медициналық ұйымдар қызметінің ашықтығын арттыруға, халықтың сенімін нығайтуға және денсаулық сақтау саласында сыбайлас жемқорлыққа қарсы берік мәдениетті қалыптастыруға септігін тигізеді.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
