Күкірт қоймасына арналған металл құрастырылымдары 25 жүк көлігімен жеткізілді.
Минералды тыңайтқыш өндіретін әлемдегі жетекші компанияның бірі «ЕвроХим» Жамбыл облысында бірегей химиялық кешен салу бойынша инвестициялық жобаны жүзеге асырып келеді.
Қазір Жаңатас маңындағы құрылыс алаңында күкірт қышқылын өндіретін зауыттың құрылысы қарқын алған. Бұл үш кезеңнен тұратын «ЕвроХим» атты ауқымды жобаның екіншісі. Бірінші кезең аясында инвестор жылына 740 мың тонна фосфорит ұнын өндіретін тау-кен кешенін салып, іске қосты.
Бірер күн бұрын компания Жамбыл облысына кесек күкіртті сақтау қоймасына арналған 540 тонна металл құрастырылым жеткізді.
Олар жергілікті климатты ескере отырып жасалған және аймақтың қар мен жел жүктемелеріне төтеп беруге арналған. Сонымен қатар, металл құрастырылым сейсмикалық төзімді және жеті баллдық жүктемеге төтеп бере алады.
Атом өнеркәсібі үшін стратегиялық шикізат болып табылатын күкірт қышқылынан бөлек, «ЕвроХим» жобаның үшінші кезеңі – минералды тыңайтқыш пен индустриялық өнім шығаратын зауыт салып жатыр. Бұл бағытта негізгі технологиялық жабдықтарды сатып алу жалғасуда.
Сарапшылардың айтуынша, салынып жатқан кешен болашақта Қазақстан экономикасының тыңайтқыш экспортына тәуелділігін азайтып, ішкі нарық қажеттілігін қанағаттандырады.
«Қазақстанның ауыл шаруашылығы министрлігінің бағалауынша, еліміздегі егістік жерлердің 70%-ы дерлік тыңайтылмайды. Себебі, фермерлер үшін қазіргі бағамен тыңайтқыш (негізінен импорттық) сатып алу тым қымбат. Мұндай жағдайда жаңа кешенде тыңайтқыш өндірісіне инвестиция салу Қазақстанның ішкі нарығының сұраныс өтейді, ал заманауи сапалы премиум-класс тыңайтқыш өнімділікті бір жарым-екі есеге арттырады. Ауыл шаруашылығы министрлігі алдағы бірнеше жылда негізгі дақылдардың өндірісін екі есе арттырмақ, ал отандық тыңайтқыштарға қол жеткізу сол міндетті шешуге бағытталған қадам болмақ», – дейді белгілі қаржы сарапшысы Расул Рысмамбетов.
Оның айтуынша, жобаның тағы бір пайдалы жағы оның өңірдегі әлеуметтік ортаға әсері. Кәсіпорын ең кемі 1,2 мың жаңа жұмыс орнын ашуға мүмкіндік береді, оның 80%-ы жергілікті тұрғындар болады.
2024 жылдың мамыр айында «ЕвроХим» қытайлық China National Engineering Company (CNCEC) мердігерлік ұйымымен Жамбыл облысындағы бірегей химиялық кешенді жобалау, салу және пайдалануға беру бойынша келісімшартқа қол қойғанын ескерген жөн.
Өнеркәсіп және құрылыс министрлігінің баспасөз қызметі
