Бірнеше күн бұрын қала тұрғындары мен белсенділер әуежай маңындағы ашық аумақтың бей-берекет қоқыс алаңына айналғанына алаңдаушылық білдіріп, «AMANAT» партиясының облыстық филиалына арнайы шағым түсірген болатын.
Тұрғындардың айтуынша, бұл жерге тек тұрмыстық қалдықтар ғана емес, сонымен қатар қоршаған ортаға және қоғамдық денсаулыққа үлкен қауіп төндіретін мал өлекселері де тасталған. Бұл жағдай аймақтың санитарлық-эпидемиологиялық ахуалын нашарлатып қана қоймай, қаланың «әуе қақпасы» саналатын маңызды аумақтың эстетикалық келбетіне де нұқсан келтірді.
Осы мәселені жедел назарға алған партия филиалы «Таза Бейсенбі» науқаны аясында кең көлемді тазалық жұмыстарын ұйымдастырып, ластанған аумақты ретке келтіруге ұйытқы болды. Игі шараға партия мүшелері, бастауыш партия ұйымдарының өкілдері және «Жастар Рухы» жастар қанатының еріктілерін қосқанда барлығы 150-ге жуық адам жұмылдырылды.
Аманаттықтардың бірлескен күш-жігері мен арнайы техникалардың көмегінің арқасында қысқа мерзім ішінде аумақтан 4 тоннаға жуық қоқыс жиналып, арнайы белгіленген полигондарға шығарылды. Бұл акция тек лас аумақты тазартып қана қоймай, тұрғындар арасында табиғатқа деген жанашырлықты ояту мен экологиялық жауапкершілікті қалыптастырудың маңыздылығын тағы бір мәрте дәлелдеді.
Жұртшылықтың шағымына дер кезінде үн қату арқылы ұйымдастырылған мұндай жұмыстар алдағы уақытта да жүйелі түрде жалғасып, өңір тазалығы қатаң бақылауда бола бермек.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
