Еркін өмірге жолдама алған сотталған азаматтардың екеуі қазақстандық болса, бірі 61 жастағы көршілес Өзбекстан Республикасының азаматы. И. есімді шетелдік ер адам Атырау қалалық сотының үкімі негізінде 2020 жылы Қазақстан Республикасы Қылмыстық Кодексінің 106-бабының 3-бөлігімен кінәлі деп танылып, 6 жылға бас бостандығынан айырылған. Бұл күні оны ҚАЖ қызметкерлері өңірлік полиция департаментіне қарасты көші-қон полиция қызметіне тапсырды.
Ал жаза мерзімі аяқталған қазақстандықтың бірі – 43 жастағы Ақмола облысының тұрғыны. Ол Алматы гарнизондық әскери прокуратурасының үкімімен қолданыстағы Қылмыстық Кодекстің 189-бабының 4-бөлігі, 2-тармағы және 369-бабының 1-бөлігі бойынша айыпты деп танылып, 9 жыл мерзімге темір торға тоғытылған болатын. Сондай-ақ тағы бір ел азаматы 3 жыл 6 ай мерзімге бас бостандығынан айырылған. 28 жастағы жамбылдық жігітке Қылмыстық Кодекстің 190-бабының 3-бөлігі, 4-тармағымен айып тағылған.
Аталған азаматтарды мекеме қақпасынан шығарып салу барысында оларға бостандықтағы құқықтары мен міндеттері кеңінен түсіндірілді. ҚАЖ қызметкерлері жазасын өтеушілерге заң талаптарын бұзбауды қатаң ескертіп, болашақтағы өмірлеріне сәттілік тіледі.
