Қазақстандағы жаңа Вице-президент қызметінің негізгі міндеті — Президенттің тапсырмасы бойынша мемлекет басшысының атынан өкілдік ету және жоғары мемлекеттік органдар арасындағы өзара іс-қимылды қамтамасыз ету. Бұл өкілеттіктер жаңа Конституцияның 49-бабында және «Қазақстан Республикасының Президенті туралы» Конституциялық заңның 24-бабында бекітілген.
Негізгі жұмысы:
- Президенттің тапсырмасы бойынша Құрылтаймен өзара іс-қимыл жасап, Президент атынан өкілдік етеді;
- Үкіметпен және басқа мемлекеттік органдармен байланыста Президент атынан әрекет етеді;
- Президент жүктеген өзге де мемлекеттік міндеттер мен өкілеттіктерді жүзеге асырады;
- мемлекеттік билік институттарының өзара үйлесімді жұмыс істеуіне қатысады.
Яғни Вице-президент Премьер-министрдің жұмысын қайталамайды. Премьер-министр Үкіметті басқарып, экономика, бюджет, әлеуметтік сала және мемлекеттік бағдарламалардың орындалуына жауап берсе, Вице-президенттің негізгі рөлі — Президенттің тапсырмаларын орындау және Президент–Құрылтай–Үкімет–мемлекеттік органдар арасындағы саяси-институционалдық байланысты қамтамасыз ету.
Тағы бір маңызды талап: Вице-президент қызмет атқарып жүрген кезде депутат бола алмайды, басқа ақы төленетін қызмет атқара алмайды, кәсіпкерлікпен айналыса алмайды және саяси партия мүшесі бола алмайды.
Сондықтан Ерлан Қариннің жаңа қызметін бір сөйлеммен түсіндірсек: «Вице-президент – Президенттің тапсырмасы бойынша Құрылтаймен, Үкіметпен және өзге мемлекеттік органдармен өзара іс-қимылда Мемлекет басшысының атынан өкілдік ететін жоғары лауазымды тұлға» деуге болады.
