«Заң мен тәртіп» қағидатын жүзеге асыру аясында Жамбыл облысы Полиция департаменті Тараз қаласындағы Mart сауда ойын-сауық орталығында тұрғындармен кездесу өткізді.
Іс-шара барысында департаменттің түрлі салалық қызмет өкілдері азаматтарды қабылдап, интернет-алаяқтық, жол қозғалысы қауіпсіздігі, қоғамдық тәртіп, көші-қон заңнамасы, әкімшілік құқық бұзушылықтар және өзге де құқықтық мәселелер бойынша түсіндіру жұмыстарын жүргізді. Сонымен қатар тұрғындар өздерін толғандырған сауалдарын қойып, ұсыныс-пікірлерін ортаға салды.
Кездесуде интернет-алаяқтықтың алдын алу бағытындағы ақпараттық-түсіндіру жұмыстарына басымдық берілді. Полицейлер азаматтарды бейтаныс нөмірлерден келетін қоңыраулар мен хабарламаларға сақтықпен қарауға, жеке және банктік деректерін үшінші тұлғаларға жария етпеуге, сондай-ақ күмәнді сілтемелерге өтпеуге шақырды.
Осындай ашық қабылдаулар халық пен полиция арасындағы өзара сенімді нығайтып, азаматтардың құқықтық мәдениетін қалыптастыруға және тұрғындардың өтініштеріне жедел ден қоюға ықпал етеді.
Мақала Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
