Жастар мүгедектер қоғамының базасында ұйымдастырылған бұл орталықта әрбір келушінің өз қабілетін ашып, өзін керек сезінуіне толық жағдай жасалған. Күн сайын орталық кеңсесіне 40-тан 80-ге дейін адам келеді. Мұнда олар сурет салу, би билеу, визаж өнері және моншақпен бұйымдар өру сияқты пайдалы дағдыларды үйренеді. Бұл үйірмелер тек шығармашылықты шыңдап қана қоймай, сонымен қатар ерекше жандардың бұлшықет белсенділігін, ұсақ моторикасы мен қимыл-қозғалыс үйлесімділігін жақсартуға көмектеседі.
Жамбыл облысы әкімдігінің жұмыспен қамтуды үйлестіру және әлеуметтік бағдарламалар басқармасының қаржыландыруымен өтіп жатқан жобаны ұйымдастырушылар екінші жыл қатарынан «Асар» заңды тұлғалар бірлестігімен серіктесе отырып жүргізіп келеді. 2026 жылдың соңына дейін жоба аясында 250-ге жуық адамды қамту жоспарланған. Жоба жетекшісі, Тараз қалалық мәслихатының депутаты Әйгерім Дәулетбаеваның айтуынша, басты нәтиже — ерекше қажеттіліктері бар жандардың өмірге деген көзқарасының өзгеруі. Орталықта он жылға жуық жұмыс істеп келе жатқан заңгер Балжан Өтеулина қазіргі таңда 16 жастан асқан жастардың келуі жиілегенін және олардың графикалық дизайн мен сәндік-қолданбалы өнерді зор ынтамен меңгеріп жатқанын жеткізді. Мұнда үйренген дағдылар жастардың болашақта өз бетінше табыс тауып, қоғамда дербес тұлға болып қалыптасуына үлкен септігін тигізеді.
Жамбыл облысы әкімдігі ақпарат және қоғамдық даму басқармасының мемлекеттік ақпараттық тапсырыс негізінде жарияланды.
