ҚР Премьер-Министрі Әлихан Смайыловтың төрағалығымен өткен Үкімет отырысында биылғы қаңтар-қыркүйек айларындағы еліміздің әлеуметтік-экономикалық дамуының қорытындысы қаралды. Өз кезегінде Индустрия және инфрақұрылымдық даму министрі Қайырбек Өскенбаев өнеркәсіп, транспорт және құрылыс салаларындағы нәтижелер туралы баяндады.
2022 жылдың алғашқы 9 айының қорытындысы бойынша отандық өңдеу өнеркәсібінің барлық секторында оң серпін байқалды. Соның ішінде машина құрастыру саласында тұрақты өсім бар. Атап айтқанда, автокөлік құралдарын, трейлерлер мен жартылай тіркемелерді шығару айтарлықтай артқан.
Ал түсті металлургияда нақты физикалық көлем индексі 108,1 пайызды құрап отыр. Осы ретте айта кетерлігі, тазартылған мыс пен тазартылған күміс өндірісі «Kazakhmys Smelting» ЖШС мыс балқыту зауыттарының аяқталмаған өндірісін азайту және «Қазмырыш» компаниясының сатып алынған концентраттағы мыс құрамын ұлғайту есебінен өскен. Сонымен қатар қара металлургиядағы нақты физикалық көлем индексінің өсімі де ұлғайып, 100 пайыздық межені көрсетті.
ҚР ИИДМ басшысы жүк тасымалдау саласындағы көрсеткіштерге де тоқталды. Қайырбек Өскенбаевтың айтуынша, қазіргі таңда транзиттік контейнерлік тасымалдау секторында оң динамика байқалуда.
«Есептік кезеңде көлік саласында нақты көлем индексі 104,8 пайызды құрады. Мәселен, транзиттік контейнерлік тасымалдардың жүктер көлемінің өсімі 5 пайызды көрсетіп, 834,6 мың жиырма фунттық баламаны құрады. Бұл ретте Қазақстан аумағы арқылы өтетін транзиттік жүктер көлемінің өсу қарқыны бар. Осы бағыттағы көрсеткіш өткен жылдың сәйкес кезеңімен салыстырғанда бірнеше пайызға жоғары», – деп атап өтті Қ. Өскенбаев.
Баяндама соңында ведомство басшысы биылғы жылы министрлік жоспарланған барлық көрсеткіштерге қол жеткізуді толыққанды қамтамасыз ететіндігін айтты.