Бұл туралы Жамбыл соттары хабарлады.
Тараптар арасында сатып алу-сату (қаржы лизингі) шарты жасалып, оның талаптары бойынша жауапкер құны 27,9 млн теңге болатын арнайы техниканы (LONKING ZL50NK тиегіш) сатып алған. Талап қоюшы өз міндеттемелерін орындап, техниканы сатып алушыға берген, бірақ соңғысы төлем кестесін бұзған. 10,4 млн теңге мөлшерінде берешек қалыптасқан. Сонымен қатар, талап қоюшы 6,7 млн теңге көлемінде тұрақсыздық айыбын есептеді.
Міндеттемелердің орындалмауына байланысты талап қоюшы өз құқықтарын қорғау үшін сотқа жүгінді. Сот тараптарды татуластыру шараларын қабылдап, нәтижесінде тараптар арасында дауды медиация тәртібімен реттеу туралы келісім жасалды. Келісім шарттарына сәйкес жауапкерлер негізгі қарызды ай сайын 1 млн теңгеден өтеуге міндеттенді.
Тараптар төлем кестесі бұзылған жағдайда жауапкерлер талап қоюшыға арнайы техниканы өз еркімен қайтаруға міндеттенетінін көздеді. Талап қоюшы тұрақсыздық айыбын өндіріп алудан және талап қою талаптарынан бас тартты.Сот ұйғарымымен келісім бекітілді, азаматтық іс бойынша іс жүргізу тоқтатылды, ал талап қоюшы төлеген мемлекеттік баж қайтарылды.
Ұйғарым заңды күшіне енді.
Жамбыл облысының Сарысу аудандық соты
Сурет «ChatGPT» қосымшасындағы жасанды интеллекттің көмегімен әзірленді.Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
