Әлеуметтік желілерде патрульдік полиция қызметкерлерінің негізсіз қудалауға ұшырағаны туралы ақпарат тарады. Онда патрульдік полицейлердің надзорлық органға жүгінгені, содан кейін прокуратура тарапынан Ішкі қауіпсіздік басқармасы қызметкерлеріне қатысты сотқа дейінгі тергеп-тексеру басталғаны айтылған.
Таратылған ақпаратқа сәйкес, Жамбыл облысы полиция департаментінің Ішкі қауіпсіздік басқармасы қызметкерлері патрульдік полиция қызметкерлерін заңсыз жауапкершілікке тартуға әрекет жасаған деген күдік болған.
Сондай-ақ жарияланған мәліметте 2026 жылғы 10 наурызда Жамбыл облысы ПД Ішкі қауіпсіздік басқармасы тарапынан Патрульдік полиция батальоны (БПП) қызметкерлеріне қатысты Қазақстан Республикасы Қылмыстық кодексінің 366-бабы 3-бөлігі 2-тармағы бойынша сотқа дейінгі тергеп-тексеру басталғаны айтылған. Тергеу нәтижесінде барлық қатысы бар тұлғалардың әрекеттеріне қолданыстағы заңнамаға сәйкес құқықтық баға берілетіні көрсетілген.
Алайда бұл ақпаратқа Жамбыл облысының прокуратурасы ресми түсініктеме берді.
Прокуратураның мәліметінше, 2026 жылғы 10 наурызда Патрульдік полиция батальонының қызметкерлерінен Жамбыл облысы полиция департаментінің Ішкі қауіпсіздік басқармасы қызметкерлерінің әрекеттеріне қатысты шағым түскен. Қазіргі уақытта аталған шағым қаралу үстінде.
Сонымен қатар, прокуратура өкілдері Жамбыл облысы полиция департаментінің Ішкі қауіпсіздік басқармасы қызметкерлеріне қатысты прокуратура органдары тарапынан сотқа дейінгі тергеп-тексеру жүргізілмегенін атап өтті.
Айта кетейік, қазіргі таңда Жамбыл облысы полиция департаменті басшысының бұрынғы орынбасары Жайдарбек Құттыбаев пен Талас аудандық полиция бөлімінің бұрынғы бастығы Еркен Абаев ісі бойынша сот процесі жалғасып жатыр.
