Тараз қаласындағы дарынды ер балаларға арналған мамандандырылған «Білім-инновация» лицей-интернатының 11-сынып оқушысы Нұрқанат Бақытжанұлы Ұлттық бірыңғай тестілеуде мүмкін болған ең жоғары 140 балды жинап, өңір мерейін үстем етті.
«Алтын белгі» медаліне үміткер жас өрен осы уақытқа дейін тарих пәнінен төрт дүркін республикалық олимпиада жеңімпазы атанып, 2023-2025 жылдар аралығында «Қазақстан Білім Олимпиадасында» Қазақстан тарихы пәнінен үш жыл қатарынан І орынды ешкімге бермей, өзінің көптен дара екенін дәлелдеген болатын.
Нұрқанаттың білім көкжиегі тек ел ішімен шектелмей, халықаралық аренада да жарқырай түсті. Ол 2023 жылы Баку қаласында өткен Түркі мемлекеттерінің Ортақ Дүниесі тарих олимпиадасында қола жүлде иеленіп, бүгінде Дүниежүзі тарихы пәнінен Қазақстан Республикасының ұлттық құрама командасының белді мүшесіне айналды. Сонымен қатар, халықаралық IELTS тестінен 7.5 балдық жоғары көрсеткіш жинап, түрік тілін B1 деңгейінде меңгеруі оның әлемдік деңгейдегі бәсекеге қабілетті азамат болып қалыптасып келе жатқанын көрсетеді. Осы интеллектуалдық әлеуеті оған «ХХІ ғасыр көшбасшысы – 2026» және «Ой шебері» сынды беделді зияткерлік сайыстарда топ жаруға мүмкіндік берді.
Бойындағы білімін өнермен ұштастырған Нұрқанат — ақындық пен шешендік өнердің де хас шебері. Ол облыстық және республикалық деңгейдегі Мұқағали Мақатаев, Мәшһүр-Жүсіп, Махамбет Өтемісұлы және Бауыржан Момышұлы оқуларының бірнеше дүркін Бас жүлде иегері. Шығармашыл жастар арасындағы «Ақберен» мен «Жарқын болашақ» байқауларында «Сөз шебері» атанып, аймақ намысын абыроймен қорғап келеді. Оның бұл қоғамдық белсенділігі мен көшбасшылық қабілеті лицей өмірінде де көрініс тауып, 2024-2025 оқу жылдарында лицей парламентінің Премьер-министрі қызметін атқарды.
Нұрқанат облыстың білім саласына қосқан елеулі үлесі үшін Жамбыл облысының әкімдері Н. Нұржігітов пен Е. Қарашөкеевтің, сондай-ақ облыстық білім басқармасы басшылығының Алғыс хаттарымен марапатталған.
Осындай жоғарғы көрсеткіші үшін жерлесімізге «JUZ40» білім беру орталығы ерекше таңдау ұсынып отыр. Енді Нұрқанаттың алдында көптеген талапкердің түсіне де кірмейтін мүмкіндік тұр: ол бизнес-кластағы пәтерді, Mercedes E-Class автокөлігін немесе 50 миллион теңге ақшалай сыйлықты таңдау құқығына ие болды.
Болашақта дипломатия саласын таңдап, қазақ елінің абыройын арқалап, елді әлемге танытуды мақсат еткен жас дарынның бүгінгі 140 балдық жетістігі — барша Жамбыл жастары үшін үлкен мақтаныш әрі жігер берер өнегелі жол. Біз білім мен өнерді қатар теңгерген Нұрқанаттың алдағы асқар белдерді де бағындыратынына кәміл сенеміз.
