Жаңа тағамдық қоспа өндіріске енді. Мамандандырылған емдік-профилактикалық тамақтану өнімдері спортшылар мен зиянды және ерекше зиянды еңбек жағдайында жұмыс істейтін адамдарға арналған. Өнімнің сынақ партиясы жақсы өндірістік тәжірибеге сәйкес салынған шағын зауытта шығарылды, деп хабарлайды ҚР Ғылым және жоғары білім министрлігі.
Жаңа тағамдық өнім жасушаларды зақымданудан қорғай отырып, тотығу стрессімен күресуге көмектеседі. Ол сондай-ақ жасқа байланысты аурулардың дамуын бәсеңдетуге және қоршаған ортаның жағымсыз әсерлерімен күресуге көмектесіп кісінің физикалық және психикалық өнімділігін арттыруға көмектеседі.
«Барлық өнімдер Қазақ тағамтану академиясында міндетті сараптамадан өтіп, арнайы диеталық өнім ретінде тіркелді. Жоба бойынша жұмыс әзірлеу, тестілеу және сертификаттау кезеңдерін қоса алғанда үш жылға жуық уақытты алды», – деді жоба жетекшісі, NU NLA аға ғылыми қызметкері Серғазы Шыңғыс.
Адамның қажеттіліктеріне байланысты «Hormesis Oxy» жалпы атауымен үш өнім сериясы әзірленді: кәсіби спортшыларға, ересек жастағы адамдарға және спортпен тұрақты емес айналысатындарға арналған. Болашақта халықаралық нарыққа шығу арқылы өндіріс пен өнім түрлерін кеңейту жоспарлануда.
«Өнімдерде полифенолдардың бірегей қоспасы – негізінен өсімдік тектес биологиялық белсенді қосылыстар, гель түзуші агенттер, сондай-ақ адаптагендер мен актопротекторлардың шөп сығындылары бар. Біз тәттілендіргіштер мен калориялық толтырғыштарды алмастыратын пребиотикалық және диеталық талшық болып табылатын полидекстрозаны қолданамыз, бұл біздің өнімдерді қант диабетімен ауыратын адамдарға жарамды етеді», — деді формуланы тапқан ғалым.
Серғазы Шыңғыс Nazarbayev University жанындағы National Laboratory Astana-да ғылыми қызметкер болып істейді. Мұнда жаңа дәрі-дәрмекті іздеу және зерттеу үшін арнайы құрылған зертханада ол дәрілік әсерге төзімді инфекцияларды емдеу үшін ағзаның жасушаларына антибиотиктерді жеткізудің мақсатты әдісін әзірлеуге қатысады.
Бұған дейін дамытушы ғалымның жетекшілігімен көп жылғы зерттеулерден кейін нарыққа Qaynar тағамдық қоспасы түскен болатын. Ол жүрек-қан тамыр ауруларының дамуы мен асқынуын болдырмайтын жүзім полифенолдарының концентраты негізінде жасалған. Бұл қоспа тұтынушылар арасында сұранысқа ие.
Жаңа шөптік дәрі-дәрмектің өндірісі ағымдағы жылдың желтоқсан айында толық қуатқа шығады, жылына 120 мың қаптама дайындау жоспарланған. Жоба жеке инвестициялармен және ҚР Ғылым қорының қолдауымен жүзеге асырылуда, ол құрал-жабдықтар мен зерттеулерді қаржыландырды.
