Әскер өз қатарына туған ағайынды бауырларды шақырып қана қоймай, оларды шын мәнінде біріктіре алды. Жамбыл облысы Шу ауданынан шыққан, күзде әскерге шақырылған құрдас ағайынды Исмаил мен Надыр Ибрагимовтар Тараз гарнизонының әртүрлі әскери бөлімдерінде қызметін бастаған еді. Алайда командирлердің ұқыптылығы мен жанашырлығының арқасында олардың тарихы бір казармада бақытты жалғасын тапты. Бауырлар бір әскери бөлімге біріктіріліп, мерзімді әскери қызмет аяқталғанға дейін бірге қызмет ететін болды.
Екі бауырдың үлкені, жиырма жастағы Исмаил Ибрагимов мектептен кейін Қарағанды облысына жұмысқа кеткен. Ал кіші інісі Надыр мектепті тәмамдаған соң анасы мен әжесінің қасында, туған ауылында қалды. Шақырту қағазы келген бойда ол жергілікті әскери комиссариатқа барып, шақыру комиссиясынан өте бастады.
Осы уақытта Исмаил да әскерге шақырылғаны туралы SMS-хабарлама алды. Алайда оған Қарағандыдан Шу ауданына жету қажет болды. Ол алғашқы пойызбен Жамбыл облысына оралды, бірақ бұл кезде Надыр әскер қатарына аттанып кеткен еді.
Исмаил көп ұзамай өзі де Тараз қаласына, бірақ басқа әскери бөлімге жіберілетінін ол кезде білмеген. Ол байланыс полкінде қызмет етсе, Надыр 5-механикаландырылған бригадаға түсті. Ағайындылар бір қалада қызмет етіп жүргендеріне де қуанды, одан артықты армандамады.
Психологтар мен офицерлер өткізген жеке әңгімелер барысында туған бауырлардың көршілес бөлімдерде қызмет етіп жүргені анықталды. Осыдан кейін қолбасшылық оларды бір бөлімге біріктіру туралы шешім қабылдады. Кімнің қайда ауысатынын бауырлардың өздері таңдады. Нәтижесінде кіші бауыр Надыр ағаcы Исмаил қызмет ететін байланыс полкіне ауыстырылды.
Ауыс-түйіс Жаңа жылға дейін жүзеге асып, мерекені бауырлар бірге қарсы алды. Командирлердің айтуынша, мұндай шешім баршаға тиімді: сарбаздарға психологиялық тұрғыдан жеңіл, олар бір-біріне тірек болады, ең бастысы – ата-ананың көңілі тыныш. Ал офицерлер мен сержанттар үшін бұл жауынгерлердің моральдық тұрақтылығына қосымша сенім.
Бұл шешімге ең қатты қуанғандар – Шу ауданындағы сарбаздардың анасы мен әжесі. «Олар бір казармадан бірге видеобайланысқа шыққанда, жүрегіміз қуаныштан тоқтап қала жаздады, – дейді Джамиля мен Гильшат Бадыровалар. – Енді жанымыз тыныш, көңіліміз жайлы. Осындай адамгершілік танытқан әскер басшылығына алғысымыз шексіз».
Исмаил мен Надыр Ибрагимовтардың қайта қауышуы – жай ғана сәттілік емес. Бұл – командирлердің сарбаздарға, олардың жан дүниесіне деген мұқият әрі адамгершілік көзқарасының нәтижесі. Ағайынды бауырлардың тарихы әскердің жарғы қаталдығын адамға деген қамқорлықпен ұштастыра отырып, елдің қорғаныс қабілетімен қатар отбасылық құндылықтарды да нығайтатынының айқын дәлелі.
ҚР ҚМ Медиаорталығы Тараз гарнизонының баспасөз қызметі
