Президенттің айтуынша, түркі мемлекеттерінің тарихи және мәдени мұрасын сақтау және оны келер ұрпаққа аманат ету – баршаға ортақ міндет. Осыған байланысты Түркістанның түркі дүниесіндегі рухани рөлін ескере отырып, жаңа орталық ашу туралы бастама көтерілді.
Мемлекет басшысы жаңа орталық бауырлас елдердің бірлесіп ғылыми зерттеулер жүргізуіне, мәдени жобаларды жүзеге асыруына және білім беру бағдарламаларын дамытуына мүмкіндік беретінін атап өтті. Сонымен қатар бұл жоба гуманитарлық ықпалдастықты одан әрі күшейтуге ықпал етеді.
Қасым-Жомарт Тоқаев орталықтың жұмысын тиімді ұйымдастыру үшін Қожа Ахмет Ясауи атындағы Халықаралық қазақ-түрік университеті ғылыми-академиялық әлеуетін пайдалануды ұсынды. Президент аталған оқу орнына қажетті қаржылық және өзге де қолдау көрсетілетінін жеткізді.
Саммит аясында Түркі өркениеті орталығының іргетасын қалау рәсімі өтті. Мемлекет басшысы бұл бастамаға қолдау көрсеткен бауырлас елдердің басшыларына алғыс білдірді.
Сонымен қатар Президент Астана қаласында Дала өркениетін дәріптеуге арналған арнайы орталық ашу жоспарланып отырғанын айтты. Бұл орталықта дала халықтарының тарихы мен мәдениеті кеңінен насихатталмақ.
Қасым-Жомарт Тоқаев Түркі мемлекеттері ұйымына мүше елдерді және барлық бауырлас халықтарды аталған жобаларды қолдауға және оларды іске асыруға белсенді қатысуға шақырды.
