Ағымдағы жылдың 13-16 ақпан күндері Алматы қаласындағы Оқушылар сарайында өткен Республикалық ғылыми жобалар жарысына Қазақстанның әр аумағынан 738 оқушы қатысып, өз бақтарын сынады. Аталған додаға Жамбыл облысынан 47 жоба бойынша 57 оқушы қатысып, жүлделі орындардан көрінді.
Республикалық конкурс экономикалық және әлеуметтік процестерді математикалық модельдеу (математика, қолданбалы математика, экономика, информатика), экономикалық өсудің негізгі элементі ретіндегі ғылыми-техникалық прогресс (физика, технология, жер және ғарыш ғылымдары), салауатты табиғи орта — «Қазақстан-2030» стратегиясын жүзеге асырудың негізі (биология, химия, қоршаған ортаны қорғау және адам денсаулығы), Қазақстанның тарихи ескерткіштері және перспективті туристік маршруттар (тарих, өлкетану, этномәдениеттану, әдебиет, лингвистика, құқықтану) бағыттары бойынша ұйымдастырылды.
Облысымыздан аталған республикалық ғылыми жобалар жарысына қатысқан 57 оқушының 20-сы жүлдегер атанып, 1 оқушы алтын, 3 оқушы күміс, 16 оқушы қола медальмен және республикалық «Дарын» Республикалық ғылыми-практикалық орталығының 20 жылдығына орай 37 оқушы Грамотамен марапатталды. Атап айтқанда, информатика секциясы бойынша облыстық дарынды ер балаларға арналған «Білім-Инновация» мектеп-интернатының 11 сынып оқушысы Нұржасаров Қорған алтын медальді қанжығасына байласа, тарих секциясы бойынша облыстық Айша бибі атындағы дарынды қыз балаларға арналған «Білім-Инновация» мектеп-интернатының 11 сынып оқушысы Бахыт Аружан, техника секциясы бойынша Тараз қаласындағы №24 гимназияның 11 сынып оқушылары Амангелді Нұртілеу мен Дуля Егор күміс медаль иегерлері атанды. Ал, Тараз қаласындағы №1,7,41,45,53 мектеп-гимназияларының, облыстық ерекше дарынды балаларға арналған «Дарын» мектеп-интернатының, облыстық үш тілде оқытатын дарынды балаларға арналған мектептің оқушылары Пасечников Никита, Қойшыбек Альбина, Серікқызы Әсия, Пак Дмитрий, Пикалов Александр, Ибрагимов Рустам, Рахымбердіқызы Ақжан, Рахманберді Назым, Исламов Бекзот, Қалмұханбетова Лаура, Сулейменова Райхан, Чаушоглы Абду-Расул, Батырбек Аружан, Сембекова Тоғжан, Байжанова Луиза және Жамбыл ауданы, Б.Момышұлы атындағы орта мектептің 11 сынып оқушысы Сұранова Ақнұр құқық негіздері, этномәдениеттану, тіл білімі, қоршаған ортаны қорғау және адам денсаулығы, биология, химия, информатика, экономика, математика, жер және космос ғылыми секциялары бойынша қола медальдарды жеңіп алды.
Ғылыми жобалар додасының қорытындысы бойынша облысымыздың дарынды оқушылары командалық есепте І орынды жеңіп алып, алтыншы жыл қатарынан «Үздік команда» номинациясын иеленді.
Жерлестерімізді жеңістерімен құттықтаймыз!
