Жамбыл облысында құрылыс-монтаж жұмыстарының басталуына қатысты 640 хабарлама қабылданған. Жыл басынан бері құрылыс нысандарының сапасына 43 жоспардан тыс тексеру жүргізілді. Нәтижесінде, 148 әкімшілік құқық бұзушылық туралы іс қаралып, 26 млн. теңгеден астам айыппұл салынған. Кемшіліктерді жою үшін 11 нұсқама беріліп, 108 тапсырыс беруші, 10 мердігер мекеме, 2 жобалаушы, 19 техникалық және 9 авторлық қадағалаушы жауапкершілікке тартылған.
Бұл туралы ӨКҚ баспасөз брифингінде Жамбыл облысы әкімдігі мемлекеттік сәулет-құрылыс бақылау басқармасының басшысы Айтқазы Қарабалаев атты. Оның мәліметінше, биылдыққа 112 нысанға мониторинг жүргізілген. Заңсыз, негізгі құжаттарсыз және сапасыз құрылыстардың алдын алу, болдырмау бойынша іс-шаралар жоспарының орындалуы барысында мемлекеттік мекемелерден 79 хат түсіп, тиісті шаралар қолданылуда.
«Біз қала құрылысы және құрылыс бағытында 5 мемлекеттік қызмет көрсетеміз. Олардың қатарында құрылыс-монтаждау жұмыстарын, жобалау, іздестіру қызметтерін лицензиялау және инжинирингтік қызметтерді жүзеге асыратын сарапшыларды аттестаттау жұмыстары бар. Бұл қызметтерді алу үшін берілетін өтініштер мен оларды қарау нәтижелері электронды, Е-гов порталы арқылы жолға қойылған, яғни қызмет алушымен тікелей байланыс жоқ», — деп түсіндірді спикер.
Айтқазы Дәулетқұлұлы осы уақытқа дейін құрылыс-монтаждау жұмыстарына – 31, жобалау қызметіне – 8, іздестіру шараларына 1 лицензия берілгенін атап өтті. Инжинирингтік қызметтермен айналысатын сарапшыларға 71 аттестат үлестірілген екен. Сондай-ақ, 65 лицензия беруден бас тартылыпты.
Өңірлік коммуникациялар қызметі
