Жамбыл облысында 2026 жылдың көктемінде екі ірі халықаралық фестиваль өтеді. Іс-шаралар Туризм және спорт министрлігі бекіткен туристік «зәкірлік» күнтізбе аясында ұйымдастырылып, өңірдің мәдени және табиғи туризмін дамытуға бағытталған.
23 сәуір күні Көне Тараз тарихи-этномәдени кешені аумағында «Тараз – қолөнершілер қаласы» халықаралық фестивалі өтеді. Бағдарлама Dombyra Party-мен басталып, күні бойы концерттер, қолөнершілер көрмесі мен шеберлік сабақтары ұйымдастырылады. Кешкісін ұлттық киімдер көрсетілімі мен гала-концерт өтеді.
Ал 25 сәуірде Есейхан ауылы маңында «Қызғалдақ мұра» халықаралық фестивалі жоспарланған. Іс-шара Грейг қызғалдағының тарихи отанын танытуға және экотуризмді дамытуға бағытталған. Бағдарламада этноауыл, ұлттық спорт түрлері, театрландырылған қойылымдар мен концерттер қарастырылған.
Фестиваль аясында Нидерланд Корольдігі тарапынан 40 мың қызғалдақ пиязшығын беру жоспарланып отыр. Бұл бастама өңірдің экологиялық жобаларын дамытуға серпін береді.
Ұйымдастырушылардың айтуынша, аталған іс-шаралар туристер ағынын арттырып, өңір экономикасына, инфрақұрылымның дамуына және шағын бизнеске оң әсерін тигізеді.
Жамбыл облысы тұрғындар мен қонақтарды көктемнің ең жарқын мәдени оқиғаларына қатысуға шақырады.
