Жамбыл облысында 241 шетел азаматы жұмыс істейді, деп хабарлайды «TURANINFO.KZ» ақпарат агенттігі.
Агенттік Жамбыл облысы әкімдігінің жұмыспен қамту және әлеуметтік бағдарламалар басқармасына «Бүгінгі таңда облысымызда қанша шетел азамат жұмыс істейді, қай елден қанша адам?» деген мазмұнда сұрау хат жолдаған болатын. Басқарма басышысының орынбасары Сейдахмет Сейтбековтің төмендегідей жауап хат келді:
— «2019 жылдың 1 ақпанына Жамбыл облысында 29 жұмыс берушіде берілген рұқсаттарға сәйкес 241 шетел азаматтары жұмыс атқаруда. Оның ішінде 1-санат бойынша – 9 адам, 2-санат бойынша – 49 адам, 3-санат бойынша – 178 адам, 4-санат бойынша – 4 адам, маусымдық жұмысқа — 1 адам. Шетел жұмысшыларының қатарында Қытай, Өзбекістан, Грекия, Франция, Украина, Иран, Үндістан, Италия, Македония, Мысыр, Мальта және Израиль азаматтары бар» — делінген.
Жауапқа хатқа қарап отырсақ 1 санат бойынша 3,7 пайыз, екінші санат бойынша 20,3 пайыз, үшінші санат бойынша 74,4 пайыз, төртінші санат бойынша 1,6 пайызды көрсетіп отыр. Сонда елімізді үшінші санаттағы жұмысшылар жоқ па? Әлде шетелдіктерге өзінің туыстары мен жақындарын әкеліп миллиондаған айлық беріп, еліміздің қара домалақтарына «нан» табуға ғана қалдырып отыр ма? Мүдделі басқарма мен мемлекеттік кірістер департаментіне үшінші санаттағы қызметшілердің тізімі мен айлық жалақыларын ашық көрсетулерін дұрыс көреміз. Өйткені, халық арасында қаңқу сөздер мен дақпырттарға жол бермес үшін ашықтық саясатын қолдау қажеттілігі туындап отыр.
Айта кетерлігі, жуырда басқармаға жаңа басшысы келді. Қазіргі әлеуметтік салаға үлкен көңіл бөлу үдерісі қарқын алып келеді. Бұл қызметке әкім аппаратында он жылдан астам уақыт қызмет жасаған Тимуржан Нұрымбетов тағайындалды. Тимуржан Бидайбекұлы осыған дейін облыс әкімі аппараты басшысының орынбасары лауазымын атқарған.
Фотода: Сейдахмет Сейітбеков.
