Бұл туралы Үкімет отырысында Qazaq Aquatics Федерациясының бас хатшысы Дмитрий Баландин мәлімдеді. Ол Оқу-ағарту министрлігімен бірлесіп, жүзу сабағы мектеп бағдарламасының бір бөлігі болатын бағдарламаны енгізу бойынша жұмыстар жүргізіліп жатқанын баяндады. Жоба 2026 жылы Алматы және Астана қалаларында пилоттық режимде іске қосылып, кейіннен бүкіл ел бойынша кезең-кезеңімен енгізіледі деп жоспарлануда.
«Бұл бастама АҚШ, Австралия және Венгрия сияқты елдердің үлгісі бойынша жүзеге асырылуда, олар жүзу бойынша әлемдегі ең мықты мемлекеттердің бірі және көптеген жылдар бойы балаларды мектеп жүйесінде жүзуге міндетті оқытуды сәтті енгізіп келеді. Жобаны жүзеге асыру балалардың жас кезінен бастап қауіпсіз мінез-құлық дағдыларын қалыптастыруға, сондай-ақ оларды салауатты өмір салтының бөлігі ретінде спортқа тартуға мүмкіндік береді», — деді Дмитрий Баландин.
Бүгінгі таңда елімізде 360-тан астам бассейн бар, оның 35-і олимпиадалық стандарттағы 50 метрлік бассейндер. Су спорты жүйесінде 135 мыңнан астам адам айналысады, олармен 900-ден астам білікті жаттықтырушылар жұмыс істейді.
Үкіметтің баспасөз қызметі
