Сотпен не анықталды:
2023 жылғы 13 сәуірде шамамен сағат 03:35-те Е.К. Жамбыл облысы Шу ауданынан Алматы қаласына қарай «Hyundai Accent» маркалы автокөлігін басқарып, аталған көліктің артқы орындығында аса ірі мөлшерде «гашиш» есірткі затын өткізу мақсатында заңсыз сақтап, тасымалдаған.
Аталған көлік құралын басқара отырып, Е.К. «Батыс-Еуропа Батыс-Қытай» жолында Қордай-Шу жолының 56-шақырымында ҚР ӘҚБтК-нің 608-бабының 1-бөлігімен қарастырылған әкімшілік құқық бұзушылық жасап, патрульдік полиция инспекторларымен тоқтатылған.
Жеке басын анықтау барысында Е.К. есірткі затын заңсыз сақтау мен тасымалдау бойынша күдік туғызған, осыған байланысты Қордай аудандық ПБ жедел тобы шақырылған.
2023 жылғы 13 сәуірде сағат 06:05-те «Hyundai Accent» маркалы автокөлігін тінту барысында автосалонның артқы орындығында қол сөмкесі анықталған, оның ішінде салмағы 2828,700 грамм, аса ірі көлемде «гашиш» есірткі заты бар целлофан пакет анықталған.
Тараптардың позициясы:
Прокурор сотталушы Е.К.-ге 14 жылға бас бостандығынан айыру түріндегі жаза тағайындауды сұрады.
Сотталушы Е.К. кінәсін ішінара мойындады.
Дәлелдемелер бойынша:
Жасаған іс-әрекеті тергеп-тексеру амалдары жүргізілу барысында толтырылған процессуалдық құжаттармен, сараптамалардың қорытындыларымен, куәлердің жауаптарымен және басты сот талқылауында зерделенген қылмыстық істің процессуалдық өзге де материалдарымен дәлелденді.
Сот шешімі:
Қылмыстық жауаптылық пен жазасын жеңілдететін мән-жайлар ретінде, сот оның жас балаларының болуын таныды.
Қылмыстық жауаптылық пен жазасын ауырлататын мән-жайлар ретінде, Е.К.-нің ауыр қылмыс жасағаны үшін жойылмаған сотталғандығы бар бола тура қайтадан аса ауыр қылмыс жасағандықтан, сот қылмыстардың қауіпті қайталануын таныды.
Сот үкімімен ҚК-нің 297-бабының 3-бөлігі 3) тармағы бойынша Е.К.-ға қылмыстық-атқару жүйесінің қауіпсіздігі барынша жоғары мекемесінде жазасын өтей отырып, 10 жыл 6 айға бас бостандығынан айыру жазасы тағайындалды.
Үкім заңды күшіне енген жоқ.
