Жұмыс сапары аясында министр университеттің оқу-ғылыми инфрақұрылымын аралап, студенттердің өндірістік тәжірибеден өтуіне мүмкіндік беретін жобалардың жүзеге асу барысын көрді. Соның ішінде заманауи балық өсіру зауыты ерекше назар аудартты.
Бүгінде жоғары оқу орындарының алдында тек теориялық білім беру емес, сол білімді нақты өндіріске енгізу міндеті тұр. Университеттегі бұл жоба – ғылымды коммерцияландыру мен студенттердің практикалық дағдыларын қалыптастырудың нақты үлгісі. Министр зауыттағы технологиялық процестермен танысып, аквамәдениет саласындағы инновациялық тәсілдерге оң бағасын берді.
Саясат Нұрбектің айтуынша, қазіргі университеттер тек білім беретін мекеме ғана емес, аймақ экономикасының дамуына серпін беретін ғылыми орталықтарға айналуы тиіс. Мұндай өндіріс орындары студенттерге оқу барысында алған білімін тәжірибеде шыңдауға мүмкіндік береді.
Зауыттың маңызы білім беру үдерісімен шектелмейді. Жоба өңірді жергілікті өніммен қамтамасыз етуге, импортқа тәуелділікті азайтуға және отандық аквамәдениетті дамытуға ықпал етіп отыр. Министр мемлекет тарапынан қолданбалы ғылыми жобаларды қолдау жалғасатынын атап өтті.
Аталған жоба ҚР Ғылым және жоғары білім министрлігінің қолдауымен және Ғылым қоры арқылы бөлінген коммерцияландыру гранты аясында жүзеге асқан. Қазіргі таңда Жамбыл облысында 148 су айдыны болса, оның 80-іне университет ғалымдары ғылыми-биологиялық негіздеме әзірлеген.
Кездесу соңында министр университет ұжымына табыс тілеп, ғылым мен өндірісті ұштастыру бағытындағы жұмыстарды одан әрі күшейту қажеттігін атап өтті.
