Ең үлкен белсенділік Арбат жаяу жүргіншілер демалыс аймағындағы нүктеде байқалады – туристердің барлық сұранысының 71%-ы осында өңделеді. Бұл нүкте «Miras» университетімен бірлесіп ашылған және кеңес беруден бөлек, мұнда тегін «ақылды» СГТ (санитарлық-гигиеналық тораптар) мен «Miras Tazalyq» душ кабиналары орнатылған. Жоспар бойынша бұл алаң коворкингі, кездесулерге, жергілікті шараларға және қалалық бастамаларға арналған кеңістігі бар бизнес-орталыққа айналмақ. Қалған туристер Шымкент және Түркістан қалаларының халықаралық әуежайларындағы ақпараттық орындарды таңдады.
Барлық орталықтардың қызметкерлері шетел тілдерін (ағылшын, түрік, орыс) меңгерген, туристерге бағыттарды таңдауға көмектеседі, қала карталары мен буклеттерін ұсынады, сондай-ақ мәдени нысандар, туроператорлар, экскурсоводтар, қонақ үйлер мен тамақтану орындары туралы ақпарат береді.
Сонымен қатар, 18 тамыздан бастап «Шымқала» тарихи-мәдени кешенінің аумағында тағы бір павильон іске қосылады, жаңа әуежай терминалында және теміржол вокзалында қосымша ақпараттық орындарды ашу жоспарлануда. Жалпы алғанда, Шымкент пен Түркістан қалаларында туристерге қызмет көрсететін бес ақпараттық нүкте пайда болады.
«Visit Shymkent» миссиясы – саяхатшылар үшін жайлы жағдай жасау. Туристік нысандар мен іс-шаралар туралы ақпараттан бөлек, орталық мамандары интернет пен мобильді қосымшалардың көмегімен қоғамдық көлік бағыттары, мекенжайлар, сауда орталықтары және басқа да қажетті мәліметтер бойынша қонақтарға көмек көрсетеді.
Еске сала кетейік, біз елдегі визит-орталықтар туралы материалдар сериясын жалғастырамыз. Жалпы ел бойынша туристік ағындарды дұрыс ұйымдастыру, аймақтың жағымды имиджін қалыптастыру және әрбір қонаққа қолайлы орта жасау үшін 28 визит-орталық жұмыс істейді.
