Тараз қаласында электр энергиясын есептеу мен бақылауға арналған заманауи құрылғылар шығаратын отандық кәсіпорын жұмыс істейді. Бұл бағытта өнім өндіретін «Аспан-Energy» жауапкершілігі шектеулі серіктестігі энергетика саласын цифрландыруға үлес қосып, жоғары дәлдікті есептеу құралдарын әзірлеуде.
Серіктестік директоры Заур Беридзенің айтуынша, кәсіпорын электр энергиясын бақылау мен есептеудің автоматтандырылған жүйелерін (ЭКЕАЖ) өндіруге маманданған. Зауыт сенімділік, қауіпсіздік және энергия тиімділігі талаптарына сай келетін бір фазалы және үш фазалы көп тарифті электронды есептеуіштер шығарады.
– Біздің компанияның негізгі бағыты – заманауи талаптарға жауап беретін жоғары дәлдікті электр энергиясын есептеу құралдарын әзірлеу. Өнімдеріміз тұтынушыларға энергияны тиімді басқаруға және есеп жүргізу жүйесін жетілдіруге мүмкіндік береді, – дейді Заур Беридзе.
Кәсіпорын шығаратын барлық өнімдер қажетті сертификаттаудан өтіп, Қазақстан Республикасының Өлшем құралдарының мемлекеттік тізіліміне енгізілген. Есептеуіштер компанияның жеке техникалық талаптары негізінде дайындалады. Құрылғылар сыртқы әсерлерден, рұқсатсыз араласудан, электр энергиясын заңсыз пайдаланудан және кернеу тұрақсыздығынан қорғанудың жоғары деңгейімен ерекшеленеді.
Компания өнімдерінің қатарында түрлі үлгідегі батырмалы энергия есептегіштер бар. Олардың арасында бір фазалы және үш фазалы құрылғылар, қашықтан басқару мүмкіндігі бар есептеуіштер, бұралған жұп арқылы байланыс орнататын, PLC технологиясы арқылы дерек жіберетін және төмен қуатты радиожиілік байланысын пайдаланатын құрылғылар қамтылған.
Серіктестік директорының сөзінше, қазіргі таңда кәсіпорынның өндірістік қуаты айына орта есеппен 5000-ға дейін есептеуіш шығаруға мүмкіндік береді.
Өндіріс көлемінің артуына байланысты кәсіпорын айналым қаражатын толықтыру және қажетті жинақтауыштарды уақытылы сатып алу мәселелерін шешу үшін қаржылық қолдауға жүгінді. Осы мақсатта «Аспан-Energy» мемлекеттік қолдау тетіктерін пайдаланып, «Даму» қорының сүйемелдеуімен «Даму Өндіріс» бағдарламасы аясында «Еуразиялық банк» АҚ арқылы қаржыландыру алды.
Алынған қаражат өндірістік процестерді тұрақтандыруға, қажетті материалдар мен жинақтауыштарды сатып алуға бағытталды. Нәтижесінде кәсіпорын тапсырыстарды уақытылы орындап, өндірістік тиімділігін арттыруға мүмкіндік алды.
Бүгінде «Аспан-Energy» электр энергиясын есепке алу саласында инновациялық шешімдерді енгізуді жалғастырып келеді. Компания отандық өнім өндірісін дамыту арқылы Қазақстанның энергетикалық жүйесін жаңғыртуға және тұтынушыларды сапалы технологиялық шешімдермен қамтамасыз етуге үлес қосуда.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
