Орталықтың басты мақсаты – қоғамдағы әлеуметтік, саяси және діни процестерді ғылыми тұрғыдан зерттеу арқылы өңірлік тұрақтылықты қамтамасыз етуге ықпал ету. Сондай-ақ халықтың шынайы пікірін негізге ала отырып, мемлекеттік және қоғамдық институттардың тиімді әрі дер уақытында шешім қабылдауына қолдау көрсету.
«TALDAU» орталығының жұмыс бағыты — тек статистикалық деректер жинақтаумен шектелмей, зерттеулер нәтижесінде нақты ұсынымдар жасап, оларды қоғам мен билік арасындағы байланысты нығайту тетігіне айналдыру. Осы мақсатта орталық өңірдегі бірнеше маңызды бағыттар бойынша терең зерттеу жұмыстарын жүргізіп келеді.
Атап айтқанда, Жамбыл облысы аумағында қоғамдық-саяси ахуалдың деңгейін анықтауға бағытталған социологиялық зерттеулер жүргізіліп, тұрғындардың мемлекеттік саясатқа, жергілікті билік жұмысына деген сенімі мен үміті зерттелді. Бұл зерттеулер аймақтағы тұрақтылық пен әлеуметтік шиеленістің алдын алу шараларына ғылыми негізде қолдау бола алды.
Сонымен қатар, орталық қоғамдағы әйелдердің рөліне қатысты әлеуметтік зерттеу ұйымдастырып, олардың отбасындағы, еңбек нарығындағы, қоғамдық өмірдегі орнын айқындайтын мәліметтерді жинақтады. Бұл зерттеу гендерлік теңдік пен отбасы институтын дамыту бағытындағы нақты ұсыныстарға арқау болды.
Діни ахуалды талдау да ұйым жұмысының маңызды бір бағытына айналды. Өңірдегі діни көзқарастардың таралуы, радикалды идеяларға қарсы иммунитет қалыптастыру жолдары және конфессияаралық татулықты сақтау мәселелері терең зерделеніп, профилактикалық шараларды жетілдіруге бағытталған ұсынымдар әзірленді.
Орталық сондай-ақ ата-аналардың бала тәрбиесіндегі орнына арналған сауалнамалар мен сараптамалар жүргізіп, отбасындағы құндылықтарды нығайтуға бағытталған деректер базасын қалыптастырды. Жасөспірімдерге қатысты өзекті әлеуметтік мәселелер – буллинг, лудомания (ойынқұмарлық) және суицидтің алдын алу бойынша кешенді зерттеулер жүргізіліп, мектептер мен жастар ұйымдары үшін әдістемелік ұсыныстар дайындалды.
«TALDAU» орталығының бастамалары – қоғамның нақты сұраныстарына жауап беретін, ғылыми дәлелдер мен деректерге сүйенетін, шешім қабылдаушылар үшін бағалы құралға айналған зерттеулер жүйесі. Ұйым алдағы уақытта да өңірлік саясат пен әлеуметтік тұрақтылыққа қызмет ететін жаңа бағыттарда зерттеу жүргізуді жалғастырып, Жамбыл өңірінің қоғамдық дамуына үлес қоса бермек.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық тапсырыс негізінде жарияланды
