Ағымдағы жылдың 16 маусымында Тараз қаласының Достық үйінде «Құқық қорғау органдарының, азаматтық қоғам институттарының және Қазақстан халқы Ассамблеясының сотталғандарды қайта әлеуметтендіру мәселелері бойынша өзара іс-қимылы» атты дөңгелек үстел өтті. Бұл туралы Turaninfo.kz kz ақпараттық сайты хабарлайды.
Іс-шараны өткізудің мақсаты мекемелерге сотталған адамды түзеуге, қоғамның толық құқылы мүшесінің әлеуметтік мәртебесін қалпына келтіруге, құқық нормалары мен жалпы мінез-құлық нормалары негізінде оның қоғамдағы дербес өмірге оралуына жәрдемдесу болды. Мемлекет бұл саясатты бірінші кезекте бүгінгі таңда орын алып отырған қылмыстылық деңгейін төмендету, яғни, қазіргі қылмыстылық атқару саясаты екі кезеңмен өткізілетін сотталғандарды әлеуметтендіруге бағытталған бағыттың бірі болып табылады. Сол себепті сотталғандарды қайта әлеуметтендіру жобасы бойынша бірінші кезекте сотталғандарды қайтадан түзелу жолына түсіру, яғни, сотталғандарды бостандыққа даярлау, екінші кезекте жазасын өтеп шыққаннан кейін жұмысқа орналыстыру маңызды шара болып табылады.
Дөңгелек үстелге қылмыстық-атқару жүйесі департаментінің бастығы, әділет полковнигі Нияз Рыспаев, облыс прокуратурасының 5-ші басқарма бастығы Өсер Арынтаев, Жамбыл облысы әкімдігінің дін істері басқармасының басшысы Сәкен Мыңбаев, Жамбыл облысы әкімдігінің ІСБ «Қоғамдық келісім» КММ басшысы Парида Мамедова, Жамбыл облысы бойынша Қылмыстық-атқару жүйесі департаментінің сотталғандар арасындағы тәрбие және әлеуметтік-психологиялық жұмыс тобының бас маманы, әділет подполковнигі Айгүл Танашева, Тараз қаласының Өзбек мәдени орталығының төрағасы Абдрахман Зайнутдинов, «Радонеж» орыс қауымдастығының төрағасы Владимир Сорокин, Жамбыл облысы Байзақ аудандық «Ахыска» түрік этномәдени бірлестігінің жетекшісі Жалил Аббосов, Жамбыл облысы «Барбанг» күрділер қауымдастығының республикалық филиалы» қоғамдық бірлестігінің төрағасы Сартиф Алиев, Жамбыл облысы ҚХА Аналар кеңесінің төрайымы Мухаббат Миражапова, Жамбыл облысы ҚХА Аналар кеңесінің Жамбыл облыстық «Полонез» поляк тілі және мәдениеті орталығының өкілі Аракси Плетнева қатысты.
Аталған жиында абақтыдан босанып шыққандарға әлеуметтік көмек көрсету,білім алу, жаңа өмір бастағысы келген азаматтарға моральдық психологиялық көмек көрсету және де жеке өміріндегі құқықтарын заңды түрде қорғауға көмектесу сынды шаралар талқыланды. «Қақпа алдында кездесу»пилоттық жобасы өткізілу барысында мемлекет тарапынан берілетін әлеуметтік көмектер туралы, «Жұмыспен қамту 2020 жол картасы» бағдарламасының жүзеге асырылуы, жұмыспен қамту орталықтарының міндеттері, жастар практикасы жөнінде сотталған азаматтарға толықтай түсіндіру жұмыстарын жүргізу жөніндегі мәселелер сөз болды.
Жамбыл облысы қылмыстық-атқару жүйесі департаментінің, прокуратураның, үкіметтік емес ұйымдардың, этномәдени бірлестіктердің өкілдері және Қазақстан халқы Ассамблеясының мүшелері сотталғандарды жазалау мерзімін өтеу кезеңінде және одан кейін қайта әлеуметтендіру және бейімдеу мәселелерін талқылады. Көтерілген өзекті мәселелердің ішінде жұмысқа орналастыру, бос уақытты ұйымдастыру, еріктілік көмек көрсету сияқты бірқатар маңызды іс-қимылдар сөз болды. Өзара ынтымақтастықтың түрлі бағыттары бойынша көптеген қызықты ұсыныстар да айтылды.
