Осындағы «Тез-Ащыбұлақ» су қоймасы назар аударуды қажет ететін негізгі нысандардың бірі болып шықты. 1963 жылы пайдалануға берілген, секундына 36 текше метр су өткізе алатын су қоймасының 158,6 миллион текше метр су жинау мүмкіндігі бар екендігі туралы депутатқа жан-жақты ақпарат айтылды. Дегенмен, қазіргі уақытта су қоймасы шұғыл түрде қайта жаңғыртуды қажет етеді.
Сенатор аудан тұрғындарымен кездесу барысында осындағы ауылдарға сапалы ауыз су жеткізуге баса назар аударды. Тұрғындар өткен жылы ауыз су мәселесі аса өткір тұрған Түктібай және Ақтөбе ауылдарына таза су құбырын жеткізу мақсатында жобалық-сметалық құжаттар әзірленгені туралы депутатқа айтып берді.
«Біз өңірдегі инфрақұрылымды жақсартуға, оның ішінде ауыл тұрғындарын сапалы ауыз сумен қамтамасыз етуге қатысты барлық мәселені назарда ұстайтын боламыз. «Тез-Ащыбұлақ» су қоймасын жаңғырту және Түктібай мен Ақтөбе ауылдарына сумен жабдықтау жүйесін салу бірінші кезектегі маңызға ие. Тұрғындардың күнделікті өмірі үшін таза ауыз су – стратегиялық ресурс екені белгілі. Жергілікті атқарушы органдар осы мәселені бақылауда ұстап, бүкіл жұмысты уақтылы және сапалы орындау үшін барлық күш-жігерін жұмсауы керек», — деді сенатор.
Депутат сондай-ақ М.Әуезов атындағы орта мектептің қосымша құрылысымен де танысты. Мектепке қосымша құрылыс салуға бюджет қаражысы бөлінген болатын, ол жаңа ғимарат салуға ғана емес, ескі мектепті күрделі жөндеуге де мүмкіндік береді.
ҚР Парламен Сенатының баспасөз қызметі
