Отырыс барысында экологиялық мәдениетті қалыптастыру жаңа Конституцияның маңызды бағыты екені айтылып, Алматы қаласы, Алматы және Ақтөбе облыстарының әкімдері атқарылған жұмыстар туралы баяндады. Мәселен, Алматыда санитарлық күтімнің жаңа моделі енгізіліп, жасыл желектер саны артса, Алматы облысында қалдықтарды қайта өңдеу зауытының құрылысы мен жағажайларды абаттандыру жобалары қолға алынған. Ақтөбе өңірінде цифрландыру мен инфрақұрылымды жаңартуға, соның ішінде электромобильдерді зарядтау стансаларын орнатуға басымдық берілген. Сондай-ақ, Экология министрлігі өңірлердің жұмысын бағалайтын 5 негізгі көрсеткіштен тұратын пилоттық рейтингті таныстырды.
Жиында волонтерлік қозғалысты қолдау мен экологиялық туризмді дамыту мәселелері де кеңінен талқыланды. Бүгінде елімізде 300 мыңнан астам белсенді ерікті бар, олар үшін арнайы цифрлық паспорт пен әлеуметтік қолдау шаралары әзірленуде. Экотуризм саласында ұлттық парктерге келушілер санының артқаны байқалғанымен, Олжас Бектенов инфрақұрылымды дамыту қарқынының баяулығын сынға алды. Премьер-министр ұлттық парктерді абаттандыруға ірі бизнесті тартуды және бірыңғай дизайн-кодты енгізуді тапсырды. Орталықтың келесі отырысына дейін бұл бағыттағы жұмыстарды жандандыру және ерекше қорғалатын табиғи аумақтарда қалдықтарды тиімді басқаруды жолға қою міндеттелді.
