Жиынға Жамбыл облысының мемлекеттік сәулет-құрылыс бақылау басқармасының, «ҚазСуШар» акционерлік қоғамының басшылары, табиғат қорғау және қалалық прокуратура өкілдері мен белсенділер қатысты. Кеңес мүшелері атқарылып жатқан жұмыстардың қаланың туристік әлеуетін арттыруға септігін тигізіп жатқанын атап өткенімен, анықталған олқылықтардың деңгейі тым жоғары болып шықты. Арнайы дайындалған мониторинг нәтижесінде көшет егу науқанында сападан бұрын сан қуу әдеті әлі тыйылмай келе жатқаны мәлім болды. Отырғызылған әрбір үшінші ағаштың қурап қалуы, жасыл желектерді инвентаризациядан өткізу мен паспорттау жұмыстарының салғырттығы, уақтылы суарылмауы салдарынан бюджет қаражатының желге ұшып жатқандығы нақты деректермен дәлелденіп, қатты сынға алынды.
Отырыста қаланың ирригациялық жүйелерін жаңартуға 2023 жылы бюджеттен 2 миллиард 40 миллион теңге бөлінгеніне қарамастан, лотоктардың әлі күнге дейін қаңырап бос тұрғаны ашына айтылды. Тіпті, су жүйелерінің үстіне заңсыз тұрмыстық нысандар мен үйлердің салынып кетуі қоғам белсенділерінің наразылығын тудырды. Сонымен қатар, қаладағы кәріз және инженерлік жүйелердің қуаттылығы жыл сайын қарқын алып жатқан коммерциялық құрылыстардың сұранысын өтей алмай жатқаны белгілі болды. Жоспарсыз салынған тұрғын үйлер қала инфрақұрылымына үлкен қауіп төндіруде. Сауда орындарының ретсіздігі, заңсыз жер иелену мен «қызыл сызық» талаптарының бұзылуы да тыйылмай тұр. Оған дәлел — өткен жыл басында қызыл сызықтың үстіне салынған 41 заңсыз нысан болса, жыл соңында бұл көрсеткіш 52-ге жеткен. Қоғамдық кеңес осы мәселелер бойынша жауапты органдарға нақты ұсынымдар жолдап, жағдай жүйелі түрде реттелмейінше, бұл бағытты тұрақты бақылауда ұстайтынын ескертті.
Ақпарат Жамбыл облысы әкімдігі ақпарат және қоғамдық даму басқармасы мемлекеттік ақпараттық саясат тапсырысы негізінде жарияланды
