Биыл 1 қыркүйекте Жамбыл облысында қызметтік міндетін атқару кезінде қаза тапқан полиция қызметкерлерінің екі перзенті алғаш рет мектеп табалдырығын аттады.
Республика бойынша осы санаттағы 10 бала биыл бірінші сыныпқа барса, олардың екеуі – Жамбыл облысының бүлдіршіндері.
Білім күні балаларды мектепке полиция қызметкерлері арнайы шығарып салып, алғашқы қоңырау салтанатына бірге қатысты. Олар бүлдіршіндерге жаңа оқу жылына сәттілік тілеп, оқу құралдары мен естелік сыйлықтарын табыстады.
Балалардың әкелері – полиция қызметінде ел тыныштығы мен азаматтардың қауіпсіздігін қамтамасыз ету жолында қаза тапқан Рахат Сланбеков пен Асқар Бесбаев.
Полиция қызметкерлерінің айтуынша, бұл – бір күндік кездесу ғана емес. Қызмет барысында қаза тапқан әріптестерінің отбасылары ішкі істер органдарының тұрақты назарында. Олардың балаларының қуанышы мен жетістігі қызметтестері үшін де маңызды.
Мектеп табалдырығын алғаш аттаған екі бүлдіршінге көрсетілген құрмет – олардың әкелерінің ерлігі ұмытылмағанының, отбасыларына деген қолдау мен қамқорлықтың белгісі.
Бірінші қоңырау – балалар үшін жаңа өмір кезеңінің бастауы. Ал бұл бүлдіршіндер үшін бүгінгі күн әкелерінің ерлігі ел жадында екенін сезіндірген ерекше сәт болды.
