15 наурыз күні елімізде референдум өтеді. Ел үшін маңызды саяси науқан қарсаңында бақылаушылар да белсенділігін арттыруда. Бүгін «Халық үні» бақылаушылар тобы алдағы референдумды бақылап, дауыс беру процесінің анық, әділ әрі таза өтуіне үлес қосатынын мәлімдеді.
Саясаттанушы Нұрболат Нышанбай «Халық үні» бақылаушылар тобын құрғанын хабарлады. Оның айтуынша, топ еліміздің бірнеше қаласында бақылаушыларды оқытып, референдум барысын қадағалауды жоспарлап отыр.
Саясаттанушы әлеуметтік желідегі парақшасында былай деп жазды:
«Үлкен саяси науқан келе жатыр. Референдум! Позиция білдірер сәт. Көзқарас айқындалатын тұс. Біз де өз ұстанымымызды білдіруді жөн көрдік. Біздің ұстаным – бақылаушы болу!
Саяси науқанда, сайлау сәттерінде түрлі заңбұзушылық болып тұрады. Оны көз көріп, құлақ естіген. Комиссия тарапынан хаттама көшірмесін бермеу, дауысты бұрмалау және басқа да жағдайлар кездесуі мүмкін. Дауыс берушілер тарапынан да олқылықтар болады. Ал бақылаушының міндеті – сайлау процесінің заң талаптарына сай өтуін бақылау және заң бұзылған сәтте оны тіркеу.
Мақсат айқын, міндет анық. Өз бақылаушыларымыз отырған сайлау учаскелерінде дауыс берудің ашық, әділ өтуіне үлес қосу!»
Нұрболат Нышанбайдың айтуынша, бұл бастаманы қоғам белсенділері мен саясаттанушылар қолдап отыр. Бақылаушыларды даярлау жұмыстары жалғасуда.
