Қазақстанның спорттық бағдарламалау федерациясы International Olympiad in Artificial Intelligence (IOAI 2026) халықаралық жасанды интеллект олимпиадасында ел намысын қорғайтын ұлттық құраманың ресми тізімін жариялады. Қуанышты жаңалықтың бірі – ұлттық құраманың құрамына Тараз қаласындағы жаратылыстану-математика бағытындағы Назарбаев Зияткерлік мектебінің үш оқушысы енді.
Биыл әлемдік деңгейдегі беделді олимпиада алғаш рет Қазақстанда ұйымдастырылмақ. 2–8 тамыз аралығында Астанада өтетін додаға әлемнің 100-ден астам елінен 600-ге жуық дарынды мектеп оқушысы қатысады.
Ұлттық құраманы іріктеу бірнеше кезеңнен тұрды. 25 маусым мен 4 шілде аралығында Астанада өткен AI Training Camp оқу-жаттығу жиынына AI Olymp 2026 ұлттық іріктеуінің үздік 15 оқушысы қатысты. Он күндік дайындық барысында қатысушылар машиналық оқыту, жасанды интеллект, бағдарламалау және деректерді талдау бойынша тереңдетілген білім алып, халықаралық олимпиада форматына сай практикалық тапсырмаларды орындады.
Оқу-жаттығу жиынының қорытындысы бойынша Қазақстан намысын қорғайтын сегіз оқушы анықталды.
Ұлттық құраманың құрамы
Бірінші команда:
- Сұлтанби Исатай (Қарағанды облысы);
- Даужан Бекетов (Алматы);
- Әбу Қанабек (Алматы);
- Исламнұр Хусаинов – Жамбыл облысы, Тараз қаласы жаратылыстану-математика бағытындағы Назарбаев Зияткерлік мектебі
Екінші команда:
- Әлем Аменов (Абай облысы);
- Жәнібек Қасымқан (Жетісу облысы);
- Дінмұхаммед Ынтықбай – Жамбыл облысы, Тараз қаласындағы физика-математика бағытындағы Назарбаев Зияткерлік мектебі;
- Ұлықбек Усманов – Жамбыл облысы, Тараз қаласындағы физика-математика бағытындағы Назарбаев Зияткерлік мектебі.
Осылайша, Жамбыл облысынан үш оқушының ұлттық құрамаға енуі өңірдегі дарынды жастардың әлеуетін тағы бір мәрте дәлелдеп отыр.
Сонымен қатар ұлттық құраманың бірінші командасы 14–19 шілде аралығында Румынияда өтетін EUROAI 2026 Еуропалық жасанды интеллект олимпиадасына қатысып, халықаралық тәжірибе жинақтайды.
Қазақстанның спорттық бағдарламалау федерациясының бас хатшысы Данабек Қалиаждаровтың айтуынша, жасанды интеллект саласындағы дарынды жастарды қолдау – елдің технологиялық болашағына салынған инвестиция.
«Жасанды интеллект бүгінде әлемдік технологиялық дамудың негізгі қозғаушы күштерінің бірі. AI Training Camp оқу-жаттығу жиыны ұлттық іріктеуден өткен ең үздік оқушыларды халықаралық олимпиада талаптарына сай дайындауға мүмкіндік берді. Биыл IOAI олимпиадасының Қазақстанда алғаш рет өтуі – еліміз үшін үлкен жауапкершілік әрі Қазақстанның жаһандық AI қауымдастығындағы беделінің артып келе жатқанын көрсететін маңызды оқиға», – деді ол.
Айта кетейік, IOAI 2026 халықаралық жасанды интеллект олимпиадасы 2–8 тамыз аралығында Астанада өтеді. Олимпиада барысында қатысушылар машиналық оқыту мен жасанды интеллект бағытындағы күрделі практикалық тапсырмаларды орындап қана қоймай, білім беру және мәдени бағдарламаларға да қатысады.
Turaninfo.kz редакциясы Жамбыл облысының намысын қорғайтын Исламнұр Хусаиновқа, Дінмұхаммед Ынтықбайға және Ұлықбек Усмановқа халықаралық додада сәттілік тілейді.
Мақала Жамбыл облысы әкімдігі ақпарат және қоғамдық даму басқармасының мемлекеттік ақпараттық тапсырыс негізінде жарияланды
