Депутат БҰҰ болжамдарына сүйеніп, 2040 жылға қарай елдегі су тапшылығы 50 пайызға жетуі мүмкін екенін мәлімдеді. Бұл жағдайды гидротехникалық құрылыстардың тозуы, ауыл шаруашылығы саласында судың 40 пайызы жоғалуы, сондай-ақ, білікті мамандар жетіспеушілігі одан сайын қиындатады.
«Су саласында жұмыс істейтін мамандардың 70 пайызы бұл салада білім алмаған, ал көбі жоғары білімсіз жұмыс істеп жатыр. Жыл сайын бұл салада 300 адам білім алады, бірақ олардың тек 20 пайызы мамандық бойынша жұмыс табады», — деді Арубаев.
Оның айтуынша, Су ресурстары және ирригация министрлігі құрылғанына және Қазақ ұлттық Су шаруашылығы және ирригация университеті ашылғанына қарамастан, жоғары оқу орны күрделі проблемаларға тап болып отыр. Тозығы жеткен инфрақұрылым, зертханалық жабдықтар жетіспеушілігі, студенттер мен оқытушылардың жеткіліксіздігі кадрларды даярлауда мәселе туындатып отыр.
«Мемлекеттік тапсырыстар мен гранттар санын көбейту, мамандардың жалақысын өсіру, шетелдік жоғары оқу орындарымен академиялық алмасуды жандандыру, сондай-ақ, университетке су құрылыстарын жобалау мен сараптама жүргізуге қабілетті мекеме мәртебесін беру қажет», — деп түйіндеді депутат.
