Салтанат Түйтебаев 1945 жылғы 21 шілдеде Жамбыл облысы Мойынқұм ауданы Бірлік ауылында дүниеге келген.
1962 жылы орта мектепті бітіріп, Алматы қаласындағы педагогикалық институттың физика-математика факультетіне оқуға түседі.
Оқу барысында Кеңес армиясының қатарына шақырылып, Литва КСР-інің Каунас қаласында десанттық әскер құрамында әскери борышын өтейді. Әскерден 1967 жылы оралып, оқуын жалғастырып, 1970 жылы институтты сәтті тәмамдайды.
Сол жылы үйленіп, туған ауылындағы Киров атындағы орта мектепте физика пәнінің мұғалімі болып еңбек жолын бастайды. Жұбайы Светлана Мүлкібайқызы екеуі төрт бала тәрбиелеп өсірді.
Светлана Мүлкібайқызы өмірін педагогика және мұнай-газ саласындағы стандарттау ісіне арнап, еңбек жолын басшылық қызметте аяқтады.
1972 жылы Салтанат Түйтебаев Коминтерн (қазіргі — Биназар) ауылындағы мектепке директор болып тағайындалды.
1979 жылы Жамбыл облысының Жаңатас қаласына көшіп, орта мектептің, кейін қалалық кәсіптік-техникалық училищенің директоры қызметін атқарды. Кейін кәсіподақ органдарында жұмыс істеп, өндірістік кооперативті басқарды.
Одан кейін Алматы қаласына қоныс аударып, жекеменшік ұйымдарда еңбек етті, ал кейін Астана қаласына барып, стандарттау және сертификаттау жөніндегі ғылыми-техникалық орталықтың директоры қызметін атқарды.
Спортқа, әсіресе жеңіл атлетикаға деген сүйіспеншілігі жас кезінен қалыптасқан. Алайда дәл зейнетке шыққаннан кейін оның бойындағы шынайы әлеуеті ашылып, марафондық жүгіруді кәсіби деңгейге көтерді.
2016 жылы Австралияның Перт қаласында өткен ардагерлер арасындағы әлем чемпионатында (World Masters Athletics Championships) күміс жүлдегер атанды.
2017 жылы Жаңа Зеландияның Окленд қаласында өткен ардагерлер Олимпиадасында (World Masters Games 2017) чемпион болды.
Осы жылдар ішінде Салтанат Түйтебаев өз жас санатында Сингапур, Катар, БАӘ, Испания, Нидерланд, Түркия және басқа да елдерде өткен халықаралық марафондарда бірнеше мәрте жеңіске жетті.
2021 жылы Нью-Йорк марафонында 75–79 жас санатында күміс жүлде иеленді, ал 2025 жылы, 80 жасында, сол Нью-Йорк марафонында жеңіске жетіп, тарихи жетістікке қол жеткізді.
Бүгінде 80 жастағы Салтанат Түйтебаев күн сайын жаттығып, жарыстарға қатысып келеді. Ол өз өмірімен «жас — тек сан, ал рух — мәңгі» екенін дәлелдеп жүр.
Бүгінгі Нью-Йорк марафонындағы жеңісі — соның айғағы.
Алдағы жоспары — 2026 жылғы 25 мамырда Оңтүстік Африка Республикасының Кейптаун қаласында өтетін ардагерлер арасындағы әлем чемпионатына және 2027 жылғы 10–25 мамыр аралығында Жапонияда өтетін ардагерлер Олимпиадасына қатысу.
Түйтебаевтар әулеті — еңбекқорлықтың, табандылықтың және ұрпақтар сабақтастығының жарқын үлгісі.
Қызы — Түйтебаева Динара — халықаралық дәрежедегі шахмат шебері.
Немересі — Елеусізова Әнел — футболшы, Қазақстанның 17 және 19 жасқа дейінгі қыздар құрамасының мүшесі болған, Еуропадағы іріктеу матчтарына қатысып, футзалдан әлем чемпионатына шыққан. Қазіргі таңда ол «Жеңіс» футбол орталығында жасөспірімдерге тәлім беріп жүр.
Немересі — Түйтебаева Сабина — көркем гимнастикадан спорт шеберіне кандидат, Қазақстан чемпионы.
Немерелері кішкентайынан аталарының жетістіктеріне куә болып өсті. Дәл сол кісінің үлгісі оларға спортқа деген сүйіспеншілікті дарытты. Салтанат аталары оларға еңбектің, табандылықтың, алға ұмтылудың өмірді өзгертетін күш екенін көрсетті.
Әулеттің әрбір мүшесі — білімге, спортқа және еңбекке құрметпен қарайтын ұрпақ.
Оның өмірлік ұстанымы — «Қозғалыс — өмір».
Салтанат Түйтебаев өз үлгісімен жастарды жігерлендіріп, қай жаста да үлкен жетістіктерге жетуге болатынын дәлелдеп келеді.
