Бүгін Мемлекет басшысы Қасым-Жомарт Тоқаев Қарағанды облысына жұмыс сапарымен барды деп хабарлайды turaninfo.kz ақпарат агенттігі БОРТ №1 телеграм арнасына сілтеме жасап.
Ең алдымен Президент қарағандылық жұртшылықпен кездесті. Кездесу барысында өңірдің даму үдерісі бойынша бірқатар мәселелер талқыланды.
— Қарағанды табиғи байлығымен ғана қазыналы деп аталмағаны анық. Сарыарқаның дәл жүрегінде орналасқан аймақтың рухани қазынасы да орасан зор.
Талай тарихи оқиғаның куәсі болған шежірелі аймақтан қазақтың көптеген біртуар тұлғалары шыққан. Қарағанды өңірі – Әлихан Бөкейхан, Жақып Ақбаев, Әлімхан Ермеков сияқты Алаш арыстары дүниеге келген қасиетті жер, — деді Президент өз сөзінде
Аймақтың өнеркәсіп саласында өзге өңірлерден көш ілгері екені белгілі. Қасым-Жомарт Кемелұлы бұл туралы да тілге тиек етті.
— Облыстың өнеркәсіп өндірісінің жалпы көлемінде өңдеу секторының үлесі 80 пайызды құрайды. Бұл көрсеткіш бойынша аймақ көш бастап тұр.
Сондай-ақ осы бағытты одан әрі дамыту үшін облыстың мүмкіндігі мол. Биылғы шілдеде өткен Үкіметтің кеңейтілген отырысында өңдеу саласындағы инвестициялық жобалардың пулын жасақтау жұмыстарына баса мән беру қажеттігі туралы айттым.
Күрделі геосаяси ахуалға және әлемдік экономикалық жағдайдың тұрақсыздығына байланысты отандық экономиканы әртараптандырудың маңызы одан әрі арта түседі, — деп атап өтті Президент.
