Мемлекет басшысы бұл шешім Еуразиялық экономикалық одақ аясындағы өзара ықпалдастықты жаңа деңгейге көтеруге серпін беретінін атап өтті.
Президент сөзін қорытындылай келе, қазіргі геосаяси және экономикалық жағдайда ұйымға мүше мемлекеттер алдында салмақты шешімдер мен үйлесімді іс-қимылды талап ететін күрделі міндеттер тұрғанына назар аударды. Оның айтуынша, бірлескен жауапкершілік пен нақты қадамдар ғана ортақ мақсаттарға қол жеткізуге мүмкіндік береді.
Сонымен қатар Қасым-Жомарт Тоқаев келесі жылы Еуразиялық экономикалық одақ органдарына төрағалық ету миссиясы Қазақстан Республикасына өтетінін еске салды. Президент еліміз бұл міндетті жоғары деңгейде атқарып, одаққа мүше елдердің игілігін арттыру үшін нәтижелі әрі жүйелі жұмыс жүргізуге ниетті екенін жеткізді.
Мемлекет басшысы ұйымға төрағалық ету кезеңінде тиімді бастамалар жүзеге асатынына сенім білдіріп, осы бағытта серіктес елдермен ашық әрі сындарлы диалог жалғасатынын айтты. Сондай-ақ ол Жоғары Еуразиялық экономикалық кеңеске төрағалық еткен Беларусь Республикасының Президенті Александр Лукашенкоға атқарған жұмысы үшін алғыс білдірді.
Жиын қорытындысы бойынша бірқатар маңызды құжат қабылданып, одақтың алдағы даму бағыттарын айқындайтын келісімдерге қол қойылды. Ал алдағы кеңестің Астанада өтуі Қазақстанның Еуразиялық кеңістіктегі белсенді рөлін тағы бір мәрте айқындай түспек.
