10 мамыр – әлемдегі ең мейірімді, ең жанашыр, ең қадірлі жандарға арналған ерекше күн. Бұл – бар ғұмырын баласының бақытына арнап, әр жетістігіне қуанып, әр қиындығына алаңдап жүретін аналарға құрмет көрсететін мереке.
Қазақ халқы қашанда ананы ерекше қастерлеген. «Жұмақ – ананың табанының астында» деген сөздің өзі ана мәребесінің қаншалықты биік екенін аңғартады. Себебі ана – тек өмір сыйлаған жан ғана емес, ол – тәрбиенің темірқазығы, отбасының берекесі, ұлттың рухани тірегі.
Әр адамның бойындағы мейірім, адамгершілік, ізгілік ең алдымен ана тәрбиесімен қалыптасады. Ана әлдиімен өскен бала ешқашан жамандыққа жақын болмайды. Сондықтан ананың қоғамдағы орны әрдайым ерекше. Тарихта елін қорғаған батырлар да, халқы үшін еңбек еткен тұлғалар да ананың ақ сүті мен тәрбиесін бойына сіңіріп өскен.
Бүгінде аналар тек шаңырақтың шырағын жағып отырған жандар емес. Олар түрлі салада еңбек етіп, қоғамның дамуына үлес қосып келеді. Бір қолымен бесікті тербетсе, бір қолымен елдің ісіне араласып жүрген аналардың еңбегі – үлкен құрметке лайық.
Ана – үнсіз батыр. Ол баласы үшін бәріне дайын. Тіпті өзі қиналса да, баласының жанында күлімдеп тұра алады. Осындай шексіз махаббат пен төзім – ананың жүрегіне ғана тән қасиет.
Аналар күні – аналарға гүл сыйлайтын ғана мереке емес. Бұл – ана алдындағы парызды еске түсіретін, алғыс айтатын, құрмет көрсететін күн. Анаға деген сыйластық әр адамның жүрегінде әрдайым сақталуы керек.
Құрметті аналар! Сіздерге зор денсаулық, ұзақ ғұмыр, отбасыларыңызға амандық пен бақ-береке тілейміз. Балаларыңыздың қуанышын көріп, әрдайым шаттық пен құрметке бөлене беріңіздер!
Анаға деген құрмет – адамдықтың ең биік көрінісі.
