Тараз қаласындағы «Мансап» орталық филиалының ұжымымен кездескен «Әділет» партиясының кандидаты Ришат Аманжолов пен штаб мүшесі Сауран Қалиев өңірде жаңа жұмыс орындарын ашу, азаматтарды еңбекке тарту және кәсіби әлеуетін дамытуға бағытталған сайлауалды бағдарлама міндеттерін таныстырды.
Кездесу барысында кандидат Ришат Аманжолов партияның халықты жұмыспен қамту, еңбек нарығын дамыту және азаматтардың әлеуметтік жағдайын жақсарту бағытындағы міндеттеріне тоқталды. Сайлауалды бағдарламаға сәйкес, 2031 жылға қарай шамамен 63,1 мың адамды жұмыспен қамтуға жәрдемдесудің белсенді шараларымен қамту, жыл сайын кемінде 35,8 мың азаматты жұмысқа орналастыру және 116 инвестициялық жобаны іске асыру есебінен 20 мыңнан астам тұрақты жұмыс орнын құру жоспарланған.
«Тұрақты жұмыс пен лайықты табыс – әр отбасының әл-ауқатын арттырып, өңір экономикасын нығайтудың негізі. Сондықтан жаңа жұмыс орындарын ашу, азаматтарды еңбекке тарту және кәсіби әлеуетін дамыту сайлауалды бағдарламамыздың маңызды бағыттарының бірі», – деді Ришат Бегалыұлы Аманжолов.
Сонымен қатар кездесуде мансаптық орталықтардың халықты жұмыспен қамтудағы рөлі сөз болды. Жұмыс іздеушілерге көрсетілетін қызметтердің сапасын арттыру, еңбек нарығындағы сұраныс пен ұсыныстың байланысын нығайту және азаматтардың кәсіби дағдыларын дамыту қажеттігі атап өтілді.
Жұмыспен қамту – азаматтардың тұрақты табысқа қол жеткізуіне ғана емес, қоғамдағы әлеуметтік тұрақтылық пен экономикалық өсімге де ықпал ететін маңызды бағыт. Әсіресе жастарды еңбекке тарту, кәсіби даярлықты жетілдіру және жұмыссыз азаматтарға қолдау көрсету өзекті.
Кездесу барысында мекеме қызметкерлері өз ұсыныс-пікірлерін ортаға салды. Партия өкілдері көтерілген мәселелер мен ұсыныстарды назарға алып, сайлауалды бағдарлама аясындағы бастамаларды түсіндіру және қоғаммен ашық диалог орнату жұмыстарын жалғастыратынын жеткізді.
Дайындаған: «Әділет» партиясы Жамбыл облыстық филиалының баспасөз қызметі.
Тапсырыс беруші: Д. А. Каипов.
Жамбыл облыстық мәслихаты депутаттарының сайлауында партиялық тізімді ұсынған «Әділет» партиясы» қоғамдық бірлестігінің сайлау қоры қаражатынан төленді.
