«Алкогольсіз ауыл» бастамасы және заңсыз саудамен күрес
Қоғамдық тәртіпті нығайту және салауатты өмір салтын насихаттау мақсатында Жамбыл облысының бірқатар аудандарында, соның ішінде Байзақ ауданында «Алкогольсіз ауыл» бастамасы жүзеге асырылуда.
Атап айтқанда, аудан прокуратурасының үйлестіруімен, сондай-ақ ақсақалдар мен жергілікті тұрғындардың қолдауымен Абай, Базарбай және Байзақ ауылдарында алкоголь өнімдерін сату толығымен тоқтатылды.
Сонымен қатар, ішімдік айналымы саласындағы заңнаманың сақталуын бақылау күшейтілді. Заң талаптарын бұзғаны үшін Қазақстан Республикасының Әкімшілік құқық бұзушылық туралы кодексінің (ӘҚБтК) 200-бабы бойынша 25 тұлға әкімшілік жауапкершілікке тартылды.
Нақты мысал: Байзақ аудандық сотының 2026 жылғы 26 ақпандағы қаулысымен ірі супермаркеттердің бірі тыйым салынған уақытта алкоголь өнімін сатқаны үшін кінәлі деп танылды. Оған ӘҚБтК-нің 200-бабы бойынша 432 мың теңге көлемінде айыппұл салынып, лицензиясының қолданылуы бір ай мерзімге тоқтатылды. Алайда, енгізілген шектеулерге қарамастан, рейд барысында лицензия уақытша тоқтатылған кезеңде де алкоголь өнімдерін сақтау фактісі анықталды.
Прокурорлық ықпал ету актісі бойынша кәсіпорын ӘҚБтК-нің 282-бабы 7-бөлігінің 1) тармағымен кінәлі деп танылып, лицензиясынан айырыла отырып, 3 миллион теңгеден астам айыппұл түріндегі әкімшілік жазаға тартылды.
Қабылданған шаралар мас күйінде жасалатын қылмыстар санын 73,4 пайызға төмендетуге септігін тигізді. Прокуратура барша азаматтарды алкоголь өнімдерінің айналымы саласындағы заңнама талаптарын мүлтіксіз сақтауға шақырады.
Мектеп жөндеуіне бөлінген бюджет қаражатын қайтару
Т. Рысқұлов ауданының прокуратурасы бюджет қаражатының жұмсалу заңдылығына талдау жүргізді. Тексеріс барысында Қаныш Сәтбаев атындағы орта мектепті күрделі жөндеуден өткізу кезінде мердігер ұйымға іс жүзінде орындалмаған жұмыстар үшін 78 миллион теңгеден астам қаражаттың негізсіз төленгені анықталды.
Прокурорлық қадағалау актісі бойынша аталған қаражат бюджетке толығымен қайтарылды. Тапсырыс беруші болып табылатын аудандық білім бөлімі, мердігер ұйым, сондай-ақ авторлық және техникалық қадағалауды жүзеге асырған тұлғалар ӘҚБтК-нің 317-бабы бойынша жалпы сомасы 1,4 миллион теңгеге әкімшілік жауапкершілікке тартылды.
Қабылданған шаралардың нәтижесінде мердігер жұмыстарды белгіленген мерзімде әрі толық көлемде аяқтап, мектеп пайдалануға берілді.
Мемлекеттік қызметшілердің еңбек құқықтарын қорғау
Т. Рысқұлов ауданының прокуратурасы жергілікті атқарушы органдардың қызметінде еңбек заңнамасының сақталуына талдау жүргізіп, азаматтардың құқықтарын қорғады.
Аудан әкімдігі мен оған қарасты мекемелер жыл сайын 58 штаттық азаматтық қызметшіге сауықтыру жәрдемақысын төлемей, ұзақтығы 24 күнтізбелік күн болатын еңбек демалысын беріп келгені анықталды. Бұл тәжірибе Қазақстан Республикасы Еңбек кодексінің 139-бабының талаптарына сәйкес келмейді.
Прокурорлық қадағалау актісінің нәтижесінде азаматтық қызметшілерге өткен жылдар үшін жалпы сомасы 9,8 миллион теңге сауықтыру жәрдемақысы төленіп, ұзақтығы 30 күнтізбелік күн болатын жыл сайынғы еңбек демалысының берілуі қамтамасыз етілді. Биылғы жылы 15 азаматтық қызметші заңды құқықтарын пайдаланып, сауықтыру жәрдемақысы төленетін 30 күндік еңбек демалысына шықты.
