Бұл кеш ақынның шығармашылық мұрасын ұлықтау, оның рухына тағзым ету, өңірдегі қаламгер қыздардың еңбегін кеңінен насихаттау, поэзия мен руханияттың құндылығын дәріптеу, кітап оқу мәдениетін дамыту, сондай-ақ жас қаламгерлердің шығармаларын көпшілікке таныстыру мақсатында өткізілді.
Кешке өңіріміздің зиялы қауым өкілдері, сөз өнерінің саңлақтары – ақын-жазушылар мен әдебиет майталмандары, «Amanat» партиясы жанындағы әйелдер қанатының өкілдері, ақын Күләш Ділдәқызының өмірлік серігі, белгілі ақын Қайырбек Зәйтенұлы Асанов, ақынның құрбылары мен оның ізін жалғап келе жатқан ақын-жазушы сіңілілері, қоғам белсенділері, замандастары, курстастары және өмір жолында үзеңгілес болған аяулы жандар қатысты.
Әдеби кеш «Көктем вальсі» мектеп оқушыларының би ансамблінің әсерлі биімен ашылды. Шара барысында зиялы қауым өкілдері мен қонақтар ақын шығармашылығы туралы ой-пікірлерін білдіріп, жүрекжарды лебіздерін арнады. Атап айтқанда, Жамбыл облысы әкімдігінің аппарат басшысы Лесбек Ілебаев кештің ашылуында құттықтау сөз сөйлеп, Күләш Ахметованың қазақ поэзиясындағы ерекше орнын атап өтті. Қазақстан Жазушылар одағының мүшесі, ақын Шырын Мамасерікова ақынмен байланысты естеліктерімен бөлісіп, оның шығармашылығының тереңдігін жеткізді. Сондай-ақ, «Жаңару» РҚБ Жамбыл облыстық филиалының директоры Қасымхан Төлендиев пен Қазақстан Журналистер одағы Жамбыл облыстық филиалының төрағасы, «Ғұмыр-дария» газетінің бас редакторы Жаңабай Миллионов ақын туралы естеліктерімен бөлісіп, жылы лебіздерін білдірді.
«Анаға тағзым» облыстық отбасылық даму әлеуметтік орталығының директоры Эльмира Мырза-Ғали жоба авторы ретінде жинаққа енген қаламгер қыздардың шығармашылығына тоқталып, ізгі тілегін жеткізді.
Кеш аясында «Анаға тағзым» орталығынан құрылған «Інжу-маржан» қаламгер қыздар кеңесі мүшелерінің шығармалары топтастырылған «Інжу-Маржан» жинағының тұсаукесер рәсімі өтті. Жинақтың тұсауын ақын, Қазақстан Жазушылар одағының мүшесі Шырын Мамасерікова, ақын, журналист, Халықаралық «Алаш» әдеби сыйлығының иегері Ғайни Әлімбекқызы және «Amanat» партиясы Жамбыл облыстық филиалы Әйелдер қанаты басшысының кеңесшісі Рахия Тұрмаханбетова бірге кесіп, жүрекжарды тілектерін білдірді.
Тұсаукесерден соң сахна төрі ақын қыздардың – ақын, журналист, Қазақстан Жазушылар одағының мүшесі Жұлдыз Бейсек пен ақын, журналист Арайлы Жақсылықтың жыр шашуымен ұласып, кештің көркін аша түсті.
Кеште Күләш Ахметованың сөзіне жазылған әндер мен ақын поэзиясынан оқылған шығармалармен жалғасын тапты. Атап айтқанда, №66 орта мектебінің талантты оқушылары мен №45 мектеп-гимназиясының оқушысы Бағжан Берген ақын өлеңдерін мәнерлеп оқып, поэзияның көркемдік қуатын көрермендерге жеткізді. Ақынның сөзіне жазылған «Нағашыма» әнін Нұргүл Мусали әсерлі орындаса, «Жақсылықтың бағасы» әнін К.Әзірбаев атындағы филармониясының әншілері Ғани Мәтебаев пен Айгүл Мақашова жоғары деңгейде шырқап, кештің мазмұнын байыта түсті. Ал Кентау Назарбектің «Сен қазақсың!» әнін Орынбасар Бақытұлы орындап, көрерменнің зор қошеметіне ие болды.
